Перейти к основному содержанию

1941-йис

ЯхцIурни сад лагьай йис:
Гад алукьна гуьлуьшан.
Са хьел хьиз зи япарихъ
Ван галукьна перишан.
А чIавуз чун колхоздин
ЭчIел эчIез никIевай.
Рушарикай са паяр
Булахдал физ рекьевай...
ЧIуру хабар галукьна,
Квар аватна къуьневай.
Фенай вири ватан хуьз -
ГъвечIи-чIехи хуьревай.
А чIавуз чал душманди
Кьве югъ хьанвай вегьена.
Самолетрин сесери
Чил-цав кузвай, ифена.
Чи къуватри, сабурдик
Кьве югъ абуруз багъишнай.
Яб тагана, душманди
Шегьер, кIвал, хуьр батмишнай.
Къати сел хьиз, къанихар
Моздокдал кьван атанай.
Ахпа, фена, игитри
Душмандин рехъ атIанай.
Хура турла, хипер хьиз,
Душман кьулухъ кат хьана,
Лаш галукьай кицIер хьиз,
Магъарайра гьат хьана.
Амазма чахъ игитар
Берлиндиз кьван чукурай,
Игитвилелд Рейхстагдал
Яру пайдах акIурай.
ХьаначиртIа Сталин,
Кьве югъ тир чахъ амайди.
Ам тир, Шалбуз дагъ хьтин,
Гьулдандин рикI авайди.
Гьар са хуьруьн винел чи
Музыкадин сес жедай,
Зиян гурдаз са сефер
Адан сая бес жедай.
Жанавурни хеб санал
Нез, хкведай яйлахдай.
Ял ядайла, санал физ,
Яд хъваз, хквез булахдай.
Чанда гила кичI ава
КIвач эцигдай чиликай.
Хкатзава ваз душман
Физвай дуьзен рекьикай.
Ери ятIа жуван чил,
Пиршипиррив ацIанва.
Бязибурун сив, кьве гъил
Ивидивди кьацIанва.
Аквар гьалда, дуьньядихъ
Гзаф хьанва аллагьар.
Гафар хьанва кьуру тир
Кьинер лугьур валлагьар.
Пудкъанни цIуд йисуз чал
Ислягьвилин гар ала.
Гъалибвилин пайдахдал
Сталинан тIвар ала.

Добавить комментарий

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.