“Лезгистандикай” гъвечIи риваят

Лезги халкьдин тарихдикай сад ва кьвед лагьай сеферда Къ.Х. АКИМОВА акъуднавай “Лезгистан” энциклопедияда, манадиз дерин, сергьятриз гегьенш, дережадиз вине кІватІнавай кьван материалрин девлетлувилиз вил ахъагъайла…

Шалбуз дагъдилай къарагъайла гар,
Ирид жуьредин чкІана рангар.
Шарвили, гъиле кьуна хьиз пайгар,
Акур касдивай чуьруькиз жедан?
И кардиз секин килигиз жедан?

Гьажи Давудни Фетяли - Лезги,
Мегьаммед Ярагъ - Намусдин гуьзгуь,
Эмин, Сулейман - Шиират экуь,
И ктаб кьуру тебрикиз жедан?
И кардиз секин килигиз жедан?

Лезгистандикай акъудун ктаб
Гьи кьадар четин кар ятІа яраб?
Халкь санал кІватІал ийизвай прораб,
Ам кІватІ хъувуна, гилигиз жедан?
И кардиз секин килигиз жедан?

Вуж я а алим, вуж я а жерягь?
Кьве пад сад хъийиз авай кас темягь.
“Лезгистан” санал кІватІзавай “пачагь”?
Ихьтин еке кар гъилийиз жедан?
И кардиз секин килигиз жедан?

Гьам кхьинарчи, гьам еке алим,
Вилик тухузвай четин хел - илим;
Гьам тербиячи, гьамни муаллим,
Завай, мегер, геж тебрикиз жедан?
И кардиз секин килигиз жедан?

Эвел кьилелай кІватІална тарих,
Ктаб туькІуьрай кас кьилдин-кьилихъ,
Инсанвилин авай кас къилих,
Ам кІел тавуна, эцигиз жедан?
И кардиз секин килигиз жедан?

Энциклопедия - лугьуз я асант,
Ахьтин зегьметдиз герек я талант.
Гьар сад рикІелай тийидай алат,
Ам гвачиз чавай вилик физ жедан?
И кардиз секин килигиз жедан?

Гьам Лезгистандин, гьам Дагъустандин,
Игит тІварцІиз Куьн хас я Ватандин!
Икьван тІварар кьур гьар са инсандин,
Квехъ галаз масад шерикиз жедан?
И кардиз секин килигиз жедан?

И кьадар чІугур ктабдал зегьмет,
Сажидиназ Куьн багьа я къимет.
Игитвилин тІвар хьун патал кьисмет
Лезги халкьдивай вилик гъиз жедан?
И кардиз секин килигиз жедан?

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.