Перейти к основному содержанию

“За ви дуван аквадай...” (мажара)

Алатай асирдин 50-йисара чи хуьре, Ахнига, вичив гзаф къариба ихтилатар жедай са кас яшамиш хьана. Гьатта хуьруьн яшлу итимрини кимел адав жедай ихтилатрихъ лап дикъетдивди яб акалдай. Гьакьван ада кIватI хьанвайбур вичел желб ийидай.
Са сеферда нянин береда Бубаш бубади, кIвале къулан патав ацукьна, чай хъвазвай. Адахъни адан кьуьзуь кайванидихъ авайди анжах са кIваликайни са гъвечIи айвандикай ибарат тир куьгьне “тавхана” тир. КIвалин къав кьулухъ галай рекьихъ галаз сад хьанваз, гьатта рекьяй физвай гьайванривайни, гьич са жуьрединни четинвал авачиз, кIвалин къавал акьахиз жедай. ИкI тахьун патал Бубаш бубади кIвалин къавухъай тIуз гъулцин кIарасдикай жугъун чIугунвай. Ингье са юкъуз чIурай хтай къуншидин яц кIвалин къавал фена. Вилик квай юкъуз къвайи марфади къавун накьв хъуьтуьларнавай ва, гьаниз килигна, гьакIани ктIанвай кIвалин къавук вегьенвай тар хана, яц кIвалин къенез аватна.
Къари гьасятда кIваляй катна, амма Бубаш бубади секиндиз, яцраз са вил яна хьиз, лагьаналдай: “Ша, гьайван, жувани захъ галаз са истикан чай хъухъ”.
Белки, лап аял чIавуз ван хьайи и ихтилатдал чавай гиманни гъиз жедай жеди, эгер ихьтин кIвалах чи йикъара Кьурагьрин хуьрени хьаначиртIа. КIвалихъ цIийиз гилиг хъувунвай кIвалин дакIар чилелай са акьван гзаф вине авачир. ЦIийиз кутунвай пластикадин дакIарни, югъ рагъ авайди хьуниз килигна, ахъазвай. Къуншидин дагъда хвенвай пуд йисан кабач жунгавдиз, белки, серин чка кIанзавай жеди ва ам, гьич са четинвални авачиз, дакIардай кIвалин къенез гьахьна. Къецихъ галай хизанриз кIвалин къеняй къариба ванер атана. Фена килигайтIа, кIвале чIехи са жунгав ава. Гьасятда кIвале гьарай-эвер гьатна.
Сад кроватдин винел, масад шифоньердин кьулухъ кIеви хьана, катиз алакьайбур катна. Тадиз кIвализ хтай иеси жунгавди кIвалин пипIез гадарна. Гьарай-эвердал къуншиярни кIватI хьана. Гена я хизанриз, я кIвалин эменнидиз са артух зиян тагана, кабач кIваляй эхкъечIна. Гьаятда кутIуннавай кицIиз кабач кьаз кIан хьана. КицIин зунжурда гьатай кицIинни кабачан арадани са гъвечIи чуьруьк хьана. Зунжурдай акъатай кабач “гуя за куь дуван маса сеферда хъийида” лагьайди хьиз, винелди уьтмиш хъхьана.
- Вун са масадан жунгав яз кIандай, килигдай за ви дуван гьикI аквадайтIа, - кIватI хьанвайбуруз ван жедайвал лагьана гьеле кIвалин пипIяй кичIела юзаз тежезвай кIвалин иесиди.

Абдулла СЕМЕДОВ
Лезги газет

Рубрика

Добавить комментарий

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.