Рамазан варз

Йиса садра къведай къунагъ,
Чи рикIериз чим гудай рагъ,
Къизил чуьлдин майвадин багъ,
Вун я масан Рамазан варз!

Низ аватIа гунагь пара,
Гьадаз жеда вакай чара,
Чи уьмметдин дарман, дава,
Вун я масан Рамазан варз!

Гьар са кIвализ багъишда нур,
Сувабдин пар ийиз агъур,
Икьван рикIер чи шад авур,
Вун я масан Рамазан варз!

Гунагьривай ийиз яргъа,
Берекатар жеда мукьва,
11 вацран чIехи агъа,
Вун я масан Рамазан варз!

МичIи суруз экв гудай нур,
Шукур Аллагь, вун чаз акур,
Къадирдин йиф кьисмет авур,
Вун я масан Рамазан варз!

Марифатдин гузвай тарсар,
Ислам диндин чIехи гьунар,
Мусурманриз багьа сувар,
Вун я масан Рамазан варз!

Аллагьди чаз гайи нямет,
Ислам диндин чIехи девлет,
Багъишзавай хатур-гьуьрмет,
Вун я масан Рамазан варз!

Кьезилариз залан нефсер,
Таравихдал физва эллер,
Мергьяматдин нурлу эквер,
Вун я масан Рамазан варз!

Мубаракрай сив хуьн сувар,
Кутунвай чак гужлу лувар,
Гьар са касдин рикIин ялвар,
Вун я масан Рамазан варз!

Ухшар макъалаяр