Перейти к основному содержанию

Салам, Дербент

Гьуьлуьн лепе, квекай югъ-йиф рахазва?
Цававай гъед, квекай фикир ийизва?
АкI я хьи ваз: къенин гуьзел йикъаркай
Куьне цIийи “Дербент-наме” кхьизва.
Дербент! Дербент! Аскерри вун яракьдал,
Ашукьрини манийралди хуьз хьанай.
Заманаяр муьтIуьгъ тежер къеледин
Цларивай пашмандаказ физ хьанай.
Виш йисара метIер чиле акIурна
Ви мискIинра зикир авур дагъвидиз,
Са кап фуни са метр чит ганачир
Аллагьдини, пачагьдини, фекьиди.
ЧIехи стха Питерди ви гъил кьуна
Хкажайла вичихъ галаз женгериз,
Мусурманри сифте яз яб ганачир
МискIинрилай алахьзавай вязериз.
Каспиядал хкаж хьайи тупари,
Инкъилабдин нур янай ви куьчейриз.
Агъасиев хьтин шумуд комиссар
Вун паталди ханай дагъви дидейри!
Граждан дяведин къалин гумадай,
Комиссариз цIийи Дербент аквазвай.
Куьгьне къеле чкIиз, адан къваларив,
Чи бахтунин цIийи къеле рахазвай.
Инглисрин вил галамай ципицIрин
Чехирдин вир элкъвезва къе гьуьлериз.
Мехъер - межлис хьана чехир хъвадайла:
“Баркалла хьуй уьзуьмчийрин гъилериз!..”
Зи Дербентди ящикраваз Кефердихъ
Полярникриз Кьибледин рагъ тухузва.
Полярникри: “Дербентдин рагъ къацу я,
Амма гзаф ширинди я” - лугьузва.
Ахвар авач комбинатриз, заводриз,
Хам чилериз консервияр кIанзава.
Вагонар фад аниз рекье тун патал
Депода “тахъ-тахъ...” - кутIайри ванзава.
Лезги халкьдин театрдиз урусар,
Азербайжан, эрмени, тат физ ава.
А вахтунин миллетвилин душманвал
Пуч хьана къе ктIай кIарас хьиз ава...
Гьуьлуьн лепе фенва ширин ахварал,
Гъетерини вилер акьал ийизва.
Чехирчийри, балугъчийри, шаирри
Къенин йикъан “Дербент-наме” кхьизва...

Рубрика

Комментарии

Магомедова
06.01.2018

Алирза Саидован уьмуьрдикай кхьенайт1а к1елиз к1андай заз!

Добавить комментарий

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.