“Текивидин хвал”

ЦIийи йисан вилик ихьтин тIвар алаз Махачкъалада, “Мавел” чапханади Нуьсрет Агъакеримован шииррикайни гьикаяйрикай ибарат ктаб акъуднава. Адан авторди хейлин йисара математикадин муаллим, Дагъустандин ктабрин издательствода корректор яз кIвалахнай. Гуьгъуьнлай кьисметди ам Сумгаит шегьердиз акъудна…
Н.Агъакеримован яратмишунрихъ галаз кIелзавайбур алатай асирдин 60-йисарилай таниш я. Амма икьван чIавалди адан са ктабни чапдай акъатнавачир. Ингье, шаир рагьметдиз фейидалай кьулухъ 18 йис алатайла, къайгъудар хци — Тельман Нуьсретовича бубадин ирс квадар тавун, гележегдин несилрал агакьарун патал яратмишунар чапдиз гьазурна.
Ктабдин редактор, шаир ва публицист Мердали Жалилов сифте гафуна Нуьсрет Агъакеримован уьмуьрдин ва яратмишунрин рекьикай гегьеншдиз раханва. Анай малум жезвайвал, Н.Агъакеримован сад лагьай критик, шииратдин рекье муаллим лезгийрин чIехи лирик Шихнесир Къафлановакай хьана. Яратмишунрикай рахадайла Мердали Жалилова къейдзавайвал, Н.Агъакеримован эсерар, асул гьисабдай, хайи чиликай, зегьметдал ашукь гьунарлу халкьдикай, кIани ярдикай, дуствиликайни марифатлувиликай я. Шаирдин эсеррай чав Шалбуз дагъдин яйлахринни булахрин ширширрин ван, цуькверин атирлувал агакьзава…
Ктабда гьатнавай шииррай аквазвайвал, Нуьсрет Агъакеримов хайи ерийрални тIебиатдал гзаф кьару инсан тир. “Гатфарин тIебиат” шиирда авторди чIехи гьевесдивди тIебиатдин гуьзел легьзейрин шикилар чIугвазва:
Дегиш жезва ирид сефер цавун чин,
Гагь къай, гагь циф дагъдин
кьилел къугъвазва.
Гагь чилерал алукьзава рагъ
къизгъин,
Дагъдин хура хважамжамар
акьазва…
Бязи шииррай кIелзавайдаз шаирдин акьалтIай ватанпересвални инсанпересвал аквазва. Нуьсрет Агъакеримова Ватандин — лезги хуьрерин тарифарзава, акьалтзавай несилриз бубайрин адетар хуьниз, Ватандин къуллугъда акъвазуниз, къадирлу хьуниз эвер гузва. “Зун — сергьятдал” шиир ихьтин бендинилай гатIунзава:
Чил квахьнава йифен чIулав чуруда,
Сухвар сухиз дарзава зун аязди.
Зун — сергьятдал. Къуй дидедин
хуруда
Шириндаказ ксурай къе аял зи…
Лирический игит Ватандин сергьят хуьзвай аскер я. Югъ-йиф, къай-чим талгьана ам датIана сергьятдал мукъаятдиз акъвазнава. Вичин бала шириндиз ксун патал ада вири Ватандин архайинвал, секинвал хуьзва…
“КIани ярдиз манияр” тIвар алай пай кьиляй-кьилиз кьуд цIарцIин шииррикай ибарат я. Манийриз ухшар гьар са бендина авторди ярдин гуьзелвилин, назиквилин тарифарзава, кIанивал, михьи гьиссер бахтунин чешме тирди тестикьарзава. Абур регьят, гъавурда акьадай чIалалди кхьенва. Гьавиляй кIелизни хуш жезва.
Ктабда гьатнавай гьикаяяр тIимилбур ятIани, абурай Н.Агъакеримова лезги гьикаятдани вичиз хас хвал атIайди аквазва. Абур гьам чIалан, гьам туькIуьр хьунин, гьам къарагъарнавай месэлайрин, гьам образрин (суьретрин) тIебиивилин жигьетдай устадвилин дережада авайбур я. Рагьметлуда несилриз тунвай “хвал” квахь тийидайди я…

Мегьамед  Ибрагьимов
Лезги газет

Рубрика

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.