Чидай ксари рикIел хкизва

Агьмедулагь Гуьлмегьамедов

Заз Агьмедулагь лап хъсандиз чидай. Адан хизанрихъ, веледрихъ галаз таниш я, абур зи вилик чIехи хьана. Зи рикIел гьеле ам аспирант тир вахт алама. Чаз ам машгьур алим гьикI хьанатIа акун кьисмет хьана.
Адан бажарагъ, языкознанидиз авай гьевес, лезги чIалаз авай кIанивал гьасятда аквазвай. Ам лезги чIалан чIехи пешекар тир, амма са и кардал сергьятламиш хьана акъвазнач, урус чIални илимдин рекьелди ахтармишна. Адакай урус чIалан кафедрадин доцент хьана.
Лезги филология, лезги чIал ахтармишунин кардик А.Гуьлмегьамедова чIехи пай кутуна. Идалайни башкъа, ам умуми образованидин школаяр патал учебникрин автор я.
Эхиримжи йисара Агьмедулагьди РАН-дин Дагъустандин илимдин центрада кIвалахна. Ам чи арадай акъатун лезги халкь, гьакIни вири Дагъустан патал хажалат чIугвадай кар я.
Чи вилик адан надир ирс ва ада Россиядин илимдик кутур пай илимдин рекьелди чирунин чIехи везифа акъвазнава. Алимдин гзаф кьадар ученикар — илимдин докторар, кандидатар — ама. За фикирзава хьи, абуру адан кар агалкьунралди давамарда.
Гьамидуллагь Мегьамедов,
филологиядин илимрин доктор, профессор, Тахо-Годидин тIварунихъ галай педагогикадин НИИ-дин директор, Дагъустандин Халкьдин Собранидин депутат.
* * *
Агьмедулагь Гуьлмегьамедович гьакъикъатда зурба языковед, чи республика патал машгьур кас я. Адан са “Лезги чIалан баянрин словарь” Дагъустандин лексикографияда зурба вакъиа я.
Адакай, адан дережайрикай яргъалди лугьуз жеда. Ам гьар са куьниз рикIивай дикъет гудай, аналитически дериндай фикирай алим тир. Аспирант ва университетдин работник яз, зун адан патав илимдин идеяйрин патахъай меслят, куьмек кIанз фидай. А.Гуьлмегьамедовахъ гьамиша гзаф аспирантар хьайиди я, ада лингвистрин-лезгиноведрин чIехи школа тешкилна. Исятда адан ученикри, студентри, аспирантри Дагъустандин илимдин хиле тайин чка кьазва.
Агьмедулагь гьамиша намуслу, чIехи инсанвал квай кас ва туькIвей хизандин кьил тир. Адаз лезги чIал, вичин лезги халкь гзаф кIандай.
Нариман Абдулмуталибов,
Сулейман-Стальский райондин кьил, филологиядин илимрин доктор.
* * *
Агьмедулагь Гуьлмегьамедович заз хъсандиз чидай. Ам зи преподаватель тир. Ада чаз языкознанидай лекцияр кIелна. Чна ашкъидалди адан тарсара иштиракдай, ихьтин дережадин лингвистар Дагъустанда лап тIимил ава.
Гуьлмегьамедов машгьур алим, федеральный дережадин филолог тир. Адан лайихлувилерикай, агалкьунрикай, кIвалахрикай, ахтармишунрикай тамам энциклопедия кхьиз жеда. Важиблу кар яз къейд ийин — ам лингвистикада тамам лезгиноведение аслу тушир хел хьиз туькIуьрунин чешмейрив акъвазна. Зун адан языковед хцихъ галаз хъсандиз таниш я. Амни лап хъсан алим, лезги халкьдин патриот я.

Альберт Эседов,
общественный деятель, филологиядин илимрин кандидат.
Лезги газет

Рубрика

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.