Перейти к основному содержанию

Исмихан Къадимован цIийи дережа

Уьмуьр женг я

Чи гъилиз и йикъара яшлу шаир Исмихан Къадимован “Уьмуьр женг я” кьил ганвай цIийи ктаб атанва. Ам 329 чиникай ибарат я, вични анжах шиирри ацIурнава. Мана-метлебдиз килигна ктаб са шумуд кьилиз пайнава: “Уьмуьрдикай веревирдер”, “ТIебиатдин сегьнедай”, “Сагъламвилиз баркалла”, “КIанивилин гьиссерикай”, “Дерин фикирар куьрелди”, “Сатира ва юмор”. И кьилерай аквазвайвал, шаирдин асас темаяр уьмуьр, яшайиш, тIебиат, кIанивал, марифат, адалат, чIалан девлет хуьниз талукьбур я. Яни, автор цаварани гьуьлерал ваъ, инсанрин юкьва, хайи чилин мензерайрал ашукь яз яшамиш жезва, женг чIугвазва. Гьавиляй ктабдизни “Уьмуьр женг я” лагьана кьил ганва. Исмихан Къадимов икьван чIавалди акъатай “Уьмуьрдин сегьне”, “Шарвили”, “Хизан сир я”, “Чи руьгьдин хазина” ктабрин автор я. “Шарвили” поэмадай- ктабдай автордиз “Шарвили” эпосдин суварин премия гана. Чун рахазвай ктаб гьа и премияди руьгьламишна, арадал атанвайди яз гьиссабиз жеда. Эхь, лезги халкьдин азадвал, садвал патал махарик жедай хьтин игитвилер къалурай игитдикай поэма И.Къадимова са шумуд цIуд йис идалай вилик кхьена. Премияди автор жагъур хъувуна. Баркалла поэмадин автордизни, адаз премия гайи суварин жюридизни! Исмихан Къадимов яшлу автор ятIани, къелемди гьамиша хьиз, чилел, уьмуьрдал, инсанрал, гьахълувилел, михьивилел, гъейратлувилел ашукь яз, кIвалахзава. За адаз жуван са макъалада “лежбер шаир” жагъанва лагьанай. ГьикI хьи, гъиле сад хьиз гагь пер, гагь дергес, гагь мишерни кIута кьаз, къелемдин устадвални къалурзавай, датIана вич хуьре яшамиш жезвай, вичин вири чирвилер гьа хуьруьвайни чиливай къачунвай маса автор чаз гьелелиг малум туш. Хуьруьн шаир, чилин шаир, лежбер шаир - гьа сад хьиз кьазва гъепцегьви Исмиханан тIварцIихъ галаз. Исмиханакай рахадайла адан хуьруьнви, муаллим ва общественный деятель, хъсан публицист Агъадаш Нагъметуллаева къейднавайвал, ам дагъда хана (Докъузпара райондин куьгьне Гъепцегърин хуьр), ана чIехи хьана. Адан шииратдини датIана гьа хайи маканрихъ, дагъларихъни дерейрихъ ялварзава. ЦIийи ктабдиз кхьенвай вичин “Сифте гафуна” Гъепцегьрин юкьван школадин муаллим Н.Мегьамедрасуловади кхьизвайвал, Исмихан Къадимован цIийи ктабди са касни секин тадач, вучиз лагьайтIа, ктабда уьмуьрдин кIуь-цурудакай, хъсанвилерикайни татугайвилерикай, тIебиат хуьникай, тарихдиз, хъсан крариз, адетриз вафалу хьуникай таъсирдай чIалалди, хуш къведай рангаралди, таваралди кхьенва... Чна и гафарин тереф хуьзва.

Мердали ЖАЛИЛОВ
Лезги газет

Рубрика

Добавить комментарий

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.