Ишигъдин нур пайзавайди

КьепIирви Жавид

Къенин йикъан гьакъикъат ахьтинди я хьи, Лезги чилел, лезги дидеди хайи гзаф кьадар бажарагълу, кар алакьдай, чирвал авай рухваяр, рушар ватандивай яргъариз акъатнава.
ДатIана ватандихъ цIигелвили дарихарзаватIани, абуру чеб авай чкайра лезги лагьай тIвар баркалла алаз, вини дережеда аваз хуьзва, пешекарвилин рекьяй агалкьунар, лайихлувилер, кIвалахдин юлдашрин, яшамиш жезвай чкадин агьалийрин арада авторитет, гьуьрмет къазанмишзава. Са рахунни алач, им рикI шадардай кар я. Чавай лезги халкьдин векилар яз, чеб лайихлувилелди тухузвай гзаф ксарин тIварар кьаз жеда. Амма къенин ихтилат кьепIирви Жавидакай я. Москвада академик С.Федорован тIварунихъ галай “Вилерин микрохирургия” МНТК-да кIвалахзавай вилерин духтур, чIехи алим ва тешкилатчи, Россиядин Федерациядин лайихлу духтур МАГЬАРАМОВ Жавид Агъаевича 55 йисуз, идакай 32 йисуз Федорован илимдин зурба центрада, ишигъ зайиф хьанвай инсанриз нур, умуд хгуз зегьмет чIугвазва. Лазердин куьмекдалди вилер сагъар хъувунин рекьяй вичихъ кьетIен машгьурвал, тежриба хьанвай Жавид Магьарамован патав Дагъустандай датIана вилер начагъбур физва. Ватандиз ял ягъиз хтай куьруь вахтундани ам секиндиз тадач. КьепIирдал адан патав цIудралди куьмек кIанзавай инсанар фида. Жавид духтурдикай “Лезги газетдин” литературадин отделдин редактор Мердали Жалиловазни еке куьмек хьана. Ам кьве сеферда Москвадиз фена ва машгьур духтурди ам багъри хьиз кьабулна, журналистдин, шаирдин зайиф хьанвай вилериз ишигъ хтун патал алай аямдин технологийрикай менфят къачуна. Ихьтин галайвилер агакьай шаирдивай яраб кисна ацукьиз жедай жал?! Ада илгьамдин къелем худда туна ва арадал Жавид Агъаевич Магьарамовакай очерк, шиирар ва поэма атана. Абур М.Жалилова кьилдин ктаб язни акъудна. “Мавел” издательстовода чапнавай “КьепIирви Жавид” тIвар алай ктаб гъвечIиди ятIани, яцI алайди, метлебрив ацIанвайди, кIелдайдаз таъсирдайди, хайи чил, жуванбур кIанардайди хьанва. “Вилерикай поэма” эсердин гьа сифте цIарара шаирди дамахзава, гекъигзава: 

Эрменийрихъ
Авайди хьиз
Сасунви Давид,
Лезгийрихъни
Жедачни бес
КьепIирви Жавид!

Са кIеретI рушарилай гуьгъуъниз дидедин гъилиз, бубадин къужахдиз хва къвезва. ГьикI шадвалдач ихьтин гунугал! ГьикI еке ва къадимлу хуьрел зуьрнейрин сесер акьалтдач!.. Поэмада гьерекатар гьа икI физва: аялвал, жаванвал, жегьилвал, хизандин патай авай кIанивал, кIелунар... Хизанда, хуьре чIехи хьун, лезги халкьдин адетрин тарифлу тербия къачун... Шаир игитдин уьмуьрдин вири терефар художественный чIалалди чIагуриз алахънава ва адалай и кар алакьни авунва. Россиядин Федерацияда машгьур хирургдин лайихлувилер М.Жалилова “КьепIирви Жавид” очеркда мадни гегьеншдиз ачухарнава. Авторди ктабда чи республикадин (РОБ-дин) вилерин больницадин духтурриз бахшнавай шиирарни ганва. Имни акI лагьай гаф жезва хьи, шаирди инсандин сагъламвал хуьниз гьакъисагъвилелди къуллугъзавай вири ксариз алхишзава. Инсандин сагъламвилелай чIехи девлет ва ам хуьнилайни зурба къуллугъ авачирдал фикир желбзава. Ктабдин эхирда авторди хуш мярекатрал эзбердай тостар, алхишарни ганва. Москвада яшамиш жезвай ватанэгьлидиз ктаб рикIелни алачир савкьат жеда. Мубаракрай адазни, автордизни!

Хийир ЭМИРОВ
Лезги газет

Рубрика

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.