Бейтер

Жегьилвални вахтуналди мугьман я,
Кьуьзуьвал гьам незвай халис душман я.

Муьгьуьббатдиз туьмерзавай гар кьамир,
Гужуналди такIандакай яр кьамир.

Фана дуьнья, гайидаз на гана бул,
Тагай касдиз вучиз ятIа къайи къул?

Гъуьл гадарна, масадаз фей шеври паб,
КутIунайтIан, акъваздайд туш, ам я таб.

Тежезвайди вичин сала къелем цаз,
Алахънава ви къуншидиз багъ кутаз.

Гаф къекъуьрмир чIуру гафун палчухда,
Гьахъ крариз майдан хьурай ачухда.

Шит инсанрин гафарни гьакI шит жеда,
Дуьз инсанрин гафар пара кьит жеда.

Сад рахазва гзаф яцIу крарикай,
Кар ийирла аквада кас ахварик кваз.

Гуьрцелар жен герек виле акварбур,
РакIарар ваз жагъида дуьз кьадайбур.

Гьич шеври паб гьалт тавурай итимдал,
Варлудини авудда фад етимдал.

Уьфт ягъуналд, чIагъандай хьиз макьам жеч,
Гужлу вацIуз къван вегьиналд улам жеч.

Акьуллу кас фикирри фад явашда,
Авамвилиз пехърен уьмуьр багъишда,

Жегьилвилин къимет чида эгьлидаз,
Сагъламвилин къимет - тIалди кайидаз.

Илим вацIу тухун тийир рузи я,
Вири дуьнья аквадай са УЗИ я.

Акатайди дуст кьадайди инсан туш,
Инсанвилиз нек гудайди илан туш.

Фана дуьнья я, йиф къвез, югъ алатдай,
Инсанар я, пешер хьиз, жез, аватдай.

Еридин тум къван кьве падна экъечIда,
Цайи касни уьзягъвилик экечIда.

Кесибвили душманд ракIар къалурда,
Винелай - сагъ, чан хамуна кьурурда,

Гузвайдан гъил къачурдалай чIехи я,
Ришветбазар, белки, гьахьняй пехъи я.

Делил куьруь касдин жеда мез яргъи,
Делил яргъи касдин жеда мез куьруь.

Гьахъ инсанриз нагьахъ рекьер акъатда,
Бейхабардиз квачирбурук акатда.

Фитне - тIегъуьн, генани пис азар я,
Гьахъ инсанар адан гъиляй бизар я.

КIвачи рехъ ваъ, рекьи кIвачер гатазва,
Хайи рекьив лезги чIалал рахазва.

Регьимлудан гафуни цуьк гъидалди
Регьимсузда незва емиш жедалди.

Хъвайидан гъил кьамир, ам вич алукьда,
Я тахьайтIа, ичкидин “кIаш” галукьда.

Дарихвал - им ялгъуз кIвалин перем я,
Гьич тахьайтIа, емиш тежер къелем я.

Хъун тавурдаз экв вилерай аквада,
Ичкибаздиз ам руфунай аквада.

Хъиле хъилен твада инсан есирда,
Кар-кеспиди хкажда ам гьасирдал.

Кесиб фейи гьамамдини мурк кьуна,
Хирде авур крарини руг кьуна,

Акьул къимет авачир са девлет я,
Ферсуздаз ам гьакIан кьуру суьгьбет я.

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.