Аскердин чар

Салам я ваз, азиз диде,
И яргъал тир уьлкведай.
Акъатда гад, агатда зул,
Зун элкъвена хуькведай.
Йис акъатна, заз такуна,
Цуьк акъудай дереяр.
Аял чIавуз гъилер кьуна,
Зун къекъуьрай куьчеяр.
Вавай яргъа ятIани зун,
Ахварай заз аквазма.
Ви назик гъил, азиз диде,
Къе зи пелел алазма.
...Шумуд сефер командирди
Заз чухсагъул лагьана.
Ротад вилик, тариф ийиз,
Ви хцикай рахана.
Чир хьана заз, ватандилай
Гьич багьа затI авайд туш.
Гаф гузва за, хаин душман
Зи накьвадал тадайд туш.
Гьазур я чун ватанд рекье
Чан эцигиз гьар юкъуз.
Де мад сагърай, азиз диде,
Хуькведа зун и зулуз.