Гар

Акъатна гар, руг элкъвезва,
Къугьвазва цава.
Чуьнуьх хьанва рагъ циферик,
ЧIур хьанва гьава.
Къати жезва гьар декьикьа,
Гьайван хьиз пехъи.
Акъудзава таз пунарай,
ГьакI тарар чIехи.
КIвалин къавни кваз кукIварна,
Гадарна къвалахъ.
Вилералди аквадалди
Жедач гьич чIалахъ.
Хана хилер цуьквед тарцин,
Дамахар авур.
Амукьзава атIана пагь
Гьар са кас акур.
Векьин тая гьар патахъди
Авуна чукIур.
Гадар хьана са къвалахъди
Машинни агъур
Амма муьтIуьгъ жезвач инсан,
Гьич женжел гаруз.
Гьикьван къати ятIани ам,
РикI тежер ажуз.