Нерен вацI

Нерен вацIу, лепе гадриз лепедал,
Гьалзава пуд йикъан девран кьисметдин.
И гьайбатар алцумрай гьи уьлчмедал?
Кесибвилер амач накьан кьисметдин.
Сад ваъ, ина санлай ирид вацI ава:
Гьам деринвал ава, гьамни яцI ава.
Кьерен рува кьвал ацахьай кьацI ава:
Агакьнава гьихьтин фарман кьисметдин!
Йиса-йиса ваъ, йисарлай-йисарлай
Сад-кьве юкъуз рази я кьер ятарлай.
Къе са югъ я гьа сад-кьвед тир йикъаркай,
Гьар стIалда гьатнава ван кьисметдин.
Къенинди къе: кIантIа, ГЭС-ни элкъуьрда,
Хкетрик квай аждагьанни эхъуьрда,
Пенни кьада ашукьдин тар-чуьнгуьрда -
Дережада ава масан кьисметдин.
Я пака, я муькуь юкъуз кьурада,
Яд ацукьда даяз хьана агъада.
Я пакадин, я муькуь югъ савдада
Твазвач вацIу-деринда кIан кьисметдин.
Къе таквазвай къванер пака хкисна
Дуьздал жеда, цIалцIам къвалар экъисна.
ВацI амукьдач, кьер амукьда, вуч гьисс на
Дуьздал ийин, вилик кутан кьисметдин?
Къенин йикъахъ кьер ацIана яд авай,
Къуба-Дербент тирвал вичин ад авай
Тамарзлу яз тIалабунин дад авай
Варцар, йисар фида адан кьисметдин.
Кьве югъ патал лайихлу тир уьмуьрдиз
Дурум гудай магьрум сагъ са девирдиз
ВацI бегенмиш я Ибрагьим шаирдиз
Тайин тушир вичизни сан кьисметдин.

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.