Перейти к основному содержанию

Камран КЪУРБАНАЛИЕВ, “Алам” журналдин кьилин редактор

Камран КЪУРБАНАЛИЕВ

РикIе авай пара крар кьилиз акъудиз хьаначтIани, йис кутугайди гьисабиз жеда. “Алам” журналдин коллективди чи културадин тарихда сифте яз "Йисан манидар" конкурс кьиле тухвана ва гъалибриз "Лира" премияни гана. Халкьдин манияр номинациядай Магьира Ширинова, эстрададин манияр номинациядай Руслан Пирвердиев, манийра цIийивал номинациядай репер Элтудо гъалиб хьана. И кардикай хабар хьайи "Москвадин лезгияр" обшестводи, гьана кьиле тухузвай Яран суварин чIехи мярекатдиз чазни эвер ганай. Москвадин Останкинодин I200 кас кьазвай Королеван чIехи зал сиве-сив ацIанвай. Чи лауреатри лагьай манияр, за Яран суварикай, "Алам" журналдикай ва  "Лира" премиядикай авур куьруь ихтилатар залди са разивилелди кьабулна. 
Мартинин 2-аз "Алам" журналдин редакцияди "Марвар" тIвар алаз литературадин кIватIал туькуьрна. И кар "РикIин гафунилай" инихъ кIватI жедай са чка амачир чи зариярин лап рикIивай хьана. Вацра садра кIватI жезвай литературадин кIватIалда шаирри чпин цIийи шиирар кIелна сафунай язава. КIватIалдин кьиле талант авай зари Гуьлалийрин Эйваз акъвазнава.
Апрелдин  26-аз чи коллективди "Самур" Лезги Милли Меркездихъ галаз санал Рашид Бегьбудован тIварунихъ галай Девлетдин Манийрин Театрда “Лирадин” лауреатрин концерт кьиле тухвана. Концертда “Лирадин” гъалибрилай гъейри Бакудин "Къавкъаз" ва КцIарин "Лезгинка" кьуьлердай ансамблри, Дагъустандин ва Азербайжандин лайихлу артист Шербет Рзакъулиева, Дербентдин Лезги Театрдин солист Лариса Межидова ва манидар Агьмед Къурбановани иштиракна.
Гатуз чи журнал арадиз атана са йис хьана. Журналдин коллективди вичин дустарихъ галаз Муьшкуьрдин тама, са иер булахдал, кьиле тухвай формал тушир мярекат, “КцIар” газетдин редакцияда илифрай "Марвардин" межлисни рикIел алумукьдайди хьана. 
Октябрдин 25-аз Рашид Бегьбудован тIварунихъ галай Девлетдин Манийрин Театрда кьиле фейи поэзиядинни манийрин нян виридан рикIяй хьана. Чи зарияр Бажиханум Исаевади, Вакъиф Муьшкуьрвиди, Зерифа Кьасумовади, Римма Гьажимурадовади, Гуьлалийрин Эйваза, Бести Нифтиевади лагьай шиирар, манидарар Руслан Пирвердиев ва Магьира Шириновади, чIехи ашукь Ширинан хва Ашукь Шемшира лагьай манияр залда авайбуру капаралди кьабулна. 
Гъиле авай йисуз чи журналдин коллективди "Аламдин улубар" сериядихъ кваз кьве улубни гьазурна чапдиз ганва. Автор Жалал Жалалов тир "Чинеба гаф" чап хьанва, автор Вакъиф Муьшкуьрви тир "Лезги поэзиядин антологияни" чапда ава.
Къвери йис патални рикIе чIехи мурадар ава. Яран суварин мярекатар, жуьребажуьре конкурсар, чи журналдин са шумуд дустунин юбилеяр... ва виликдамаз лугьуз кан тийизвай са хейли крар... Сагъвал хьурай.

"Кцlар" газет

Рубрика

Добавить комментарий

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.