Шафиддин Герейханов

Шафиддин Герейханов

Шафиддин Агьмедан хва Герейханов 1937-йисуз Тlигьиржалдал дидедиз хьана. Хайи хуьре юкьван мектеб акьалтlарайдалай гуьгъуьниз Бакуда Азербайжандин Девлетдин Университетдиз кьабул хьана. Вини дережадин пешекар хьиз райондиз хтай Шафиддин Герейханова гзаф йисара чара-чара идарайра-райисполкомда, промкомбинатда, универсамда регьбервилин къуллугъра кlвалахна.
Гафунин сенятдал, кьисайрал, баядрал гъвечlи берейрилай рикl алай Шафиддина жавабдар везифайривай чара хьайдалай кьулухъ вичин уьмуьр эдебиятдиз талукьарна. Адан шиирар, драмадин эсерар 1995-йисалай кьулухъ газет ва журналра чап жез башламишна.
Куьруь са вахтунда ада са-садан гуьгъуьнаваз "Ирид рушан диде", "Нефс", "Ашкъидин цlай", "Къилиж Къемер", “Ресторан "Кукупlар", "Гьахъ чкадал къведа" ва маса сегьнедин эсерар арадал гъана.
Дагъустандин Стlал Сулейманан тlварунихъ галай лезгийрин госмуздрамтеатрдин сегьнедал эцигай "Нефс", девлетдин Кцlарин Лезги драмтеатрди сегьнеламишай "Ирид рушан диде" эсерри ам театрдин гьевескаррин арада машгьурна.
Шаир-драматургдин Бакуда "Драмаяр", Магьачкъалада "Къилиж Къемер" тlварар алай ктабар басма хьанва, шиирриз музыкаяр кхьенва.

"Кцlар" газет

Рубрика