Туна

Вил рекьева, чида , яр,
Зун квар кьуна къведа, яр,  
Гъил-гъилеваз фида, яр,
Чун булахдал квар туна.
И ашкъиди ван твада,
Вун хата я, яр, хата.
Зун хъфидан к1андат1а,
Чи рак1арив свар туна?
Агь, агатмир пара зав,
Ви дердерин чара зав,
Гуьгьуьл гудан чарадав,
За вун хьтин яр туна?
Гьатайт1а вун к1евера,
Зи т1вар кьуна эвера.
Зун къведа, яр, кифера
Цуькверин к1унч1ар туна.
Зун гайит1а чарадаз,
Яр хьайит1а чарадаз,
Зун чарасуз фида, ваз
Темен алай чар туна.