Къванцяйни акъатда цуькведин пириш,
Вахтунин, вядедин макьам хьайила.
Накъвари атIуда хъуькъверал нехиш,
Къакъатунин тIалди гуьгьуьл кайила.
Туькьуьл я, залан я чаравилин дерт,
Замандин гьарайди къакъудзава чун.
Эй зи жегьил дустар, анжах жемир перт,
Ватандин къужахди агудзава чун.
Лув гана акъатда шарагни мукай,
Дар хьана аквада аялдизни кьеб.
Замандин къанундиз вуч жеда чавай,
Гьаятдихъ галкIун я къакъатун себеб.
Къакъатун, агатун-са рекьин кьве кьил,
Уьмуьрдин гъалуни арушна кьунвай.
КIани дустарикай атIудани вил?
Вучда на гьижрандиз чун къакъудзавай?!
Гуьзел акуртIани тарарал цуьквер,
Багьади язва, дуст, къимет бегьердин.
Заланди ятIани гьижрандин дердер,
Бине я кутазвай цIийи уьмуьрдин.
Чарабур хьайитIан кьисметдин рекьер,
Хайи чил рикIелай алат тавурай.
Чарабур тахьурай анжах чи рикIер,
Анжах Ватандивай къакъат тавурай.
Добавить комментарий