Хуш я рикlиз

Дагъларал алтIушна секин я цифер,
Туьнт туракь рангада гьатнава чуьллер.
Гъетерин ишигъдик цIарапIар квачиз,
Авачиз санайни са гьарай, эвер,
Шириндиз рахазва гуьгьуьлда гьиссер,
Ажеб хуш я рикIиз гатфарин йифер.

Гьуьлуькай хкатна хъишивал галаз,
Явашдиз нур пайиз хкаж жезва варз.
Кьуд патахъ чикIизва цуькверин атир. 
Нушиз тIебиатдини агъзур жуьре наз,
Шириндиз рахазва гуьгьуьлда гьиссер,
Ажеб хуш я рикIиз гатфарин йифер.

Секиндиз юзазва тарарал пешер,
Авазва гьар пата къушарин сесер,
Гьавадихъ галазва шагьвардин нефес.
Алудна рикIелай вири пис шейер,
Шириндиз рахазва гуьгьуьлда гьиссер,
Ажеб хуш я рикIиз гатфарин йифер.