Жуван къаридиз

И чIавалди са юкъузни,
Ганач на заз каш, я къари.
Нисинихъ гуз пешчин дулма,
Няанихъни аш, я къари.
Ийида на келемдин бурш
Гьакьван дадлу, гьакьванни хуш.
Садавайни жедайди туш
На хьтин бузбаш, я къари.

Тахьурай душман бендени
Паб галачиз са вядени.
ЛагьайтIа за лап медени:
Уьмуьрдин юлдаш я, къари.
Жаванбуруз ятIани сир,
Са вахт къведа, жеда квез чир.
Виридалай вафалу тир,
Дуст, стха, сирдаш я къари.

Шаир Магьсим рахадач буш,
Стхани-вах, гьабурни хуш
Чеб-чипиз я гадании-руш
Зи къейси, машмаш я къари.