Вун кис жемир

Дуст дустуниз сейли жеда,
Вун виридаз сейли я.
Ахъайа заз на ви дердер
Зунни са дерд-эгьли я.
Сад туш, кьвед туш атай кьван
Мусибатар кьилел ви...
Заз хабар я, шумуд жуьре
Хер алатIа, рикIел ви.

Белки, белки ашкъиди вун
Канва я дуст, кабаб хьиз?
Са жаваб це, вун кис жемир
КIел тавунвай ктаб хьиз.
Белки вазни душман хьана
На фу гана хвейибур?
Чан алатIан, анжах хьи ваз
Нагагь гила кьейибур?

Белки я дуст ийизва на
Дуьнядикай хиялар?
Къе гвач лугьуз патав садни,
Жуван хайи аялар...
Ваъ, ваъ, я дуст, са чIавузни,
Лугьумир на чун тек я...
Вун шаир я, арха авай:
Вун чи халкьдиз герек я.