Вахтсуз акъатай цуьк

Какадарна кьуьдни гатфар,
Кьве кам вилик алатай цуьк.
Уьмуьр хьана гафар-чIалар
Я чан вахтсуз акъатай цуьк.
Чанда авай тIалдин-квалдин,
Кьилел алай къалмакъалдин,
Дад авачир дуьняд малдин
Шер-буьгьтендик акатай цуьк.


Лишан кумач гуьзелвилин,
Кватна пешер, ракьвана чин.
Дагъларавай виш рангунин
Яр-дустунвай къакъатай цуьк.
Цава ялгъуз кудач тек гъед,
Яр галачиз къекъведач къвед.
Чун сад-садал ашукь жен кьвед,
Кайи рикIив агатай цуьк.
Зерифедвай кьаз тахьай бахт,
Къарих хьана-хъваз тахьай бахт.
Ваз гудани, заз тагай бахт,
Чан ашкъни бахт ятакьай цуьк?
Гатфарин тахт ятакьай цуьк.