Зулун гуьруьш

Зулун пешер, к1ани рушан ч1арар хьиз,
Явашдаказ ацукьзава къуьнерал,
Дурнайрини зи шиирдин ц1арар хьиз,
Сирнавзава цавун вили вирерал.

Зи рик1ени сирнавзава хиялри,
Акъвазнавай вун къведай рехъ гуьзетиз.
Заз килигиз куш-кушзава аялри
Де лагь нивай жеда абрув гьуьжетиз?!

Хъипи пешер гуьц1 жез физва къуьнервай,
Ак1 я хьи заз ви гъилер хьиз кьулухъай
Чинеба зи вилер кьазвай.Акъатай
Хъуьтуьл шагьвар-нефес хьиз ви галукьай.

Амма вун заз яц1у чинард тандихъай
Килигзава, сивел мили хъвер алаз,
Ваз хабар туш зи ц1развай чандикай,
Хиялрикай алчуд хьанвай гвер алай.

Вун т1вар кьуна чуьнуьх жезва мад закай,
Хуп1 к1анда ваз аял ч1аван амалар,
И арада хабар жен заз, агь, вакай,
Катра къвед хьиз кьадай за ви кьамалай...

Зи т1вар кьуна экъеч1на вун ачухдал-
Нянин бере-парк ац1ана нурарив...
Зи гарданда гьатна, гъилер ачухдалд,
Тешпигь хьана гъилер катран лувариз.

Са легьзеда амукьна зун къах хьана.
Вири дуьнья кьнвайди хьиз гъилерал,
Ваз кьулухъ жез к1анзавай, заз п1агь гана,
Амма за вун незвай кузвай вилералд.

За вун кьуна хкажайла, эхир на
"Зи азизди!"-лагьанай шел кк1ана...
Цавун тагъда булутрал зар чк1ана,
"Тарки-тау" дагъларихъ рагъ ак1ана.

Ви шадвилин накъвар ифей хъуьхъверал
Кьурурзавай зи ялавлу теменри.
Ч1улав ч1арар ви мармардин къуьнерал
Эк1яй хьанвай симер хьана кемендин.

Няни хьана-кьуд пад кузвай эквер я,
Чилер-цавар ишигълаван авуна,
На лугьуди муьгьуьбатдин сегьер я,
Де гьик1 хьурай ашкъи дадмиш тавуна?!

Хъипи пешер аватзава къуьнерал,
Гьам векьерал, чи куьсруьдал-партадал...
Алачт1ан и чка гьич чарарал,
Ам хьуьзва за даим рик1ин картадал.