Рубаияр

ХьайитIани гъуьргъуь мефтIер уьцIуьриз,
Жедайди туш дуьнья цIийиз туькIуьриз.
Инсанвилин рехъ гадармир, игит хва,
Са гъед хьуй вун, ишигъ чилел куькIуьриз!

* * *
ГалачтIани жуван кьулухъ са чIехи арха,
Рехъ гудай туш за далудлай, зун я зи кавха.
Дагъви я зун, дамарра зи къекъвезва вацIар…
Ватан патал герек чIавуз чанни гуда за.

* * *
Гьайиф къвемир жуван чанни Ватан патал гуз,
Аслан хьана экъечIа вун душмандин хуруз.
Герек чIавуз игитвилел кьиникь хъсан я,
Агъузна кьил, вегьедалди кIвачерик намус.

* * *
Инсан я ман, вичин шадвал, тIал авай,
Гьиссерихъни чпин сирлу кIвал авай.
Мез атIана, кутIунналди гъилерни,
Кьаз жедай туш шаирдин рикI чIал авай.

* * *
Вуч гуьзел я! Гьамиша вун жегьил я, дуьнья.
К1анзавайди тамашдай ваз кьве вил я, дуьнья.
Сад билбил я ви бахчада, садни, есир хьиз,
Буьркьуь яз рик1 ви къузадик, сефил я, дуьнья.

* * *
Им дуьнья я, вичик умуд кутаз тежедай,
Чк1айт1ани, мад к1алубда хутаз тежедай.
Ша, къецин югъ безетмишин гьунаррив жуван,
Уьмуьр - ганвай легьзе я чаз, мад кьаз тежедай.

* * *
Вун гъурбатдиз фида - даим к1вал жеда,
Туьк1вей хизан, белки, девлет, мал жеда.
Дарихвили ялиз диде ватандихъ,
Рик1ин пата гьамиша ви т1ал жеда.

* * *
Садрани кар хьайиди туш пич1и гафунихъ,
Лагълагъар я амукьдайбур яргъи рахунихъ.
Вахтуникай, зегьметдикай хьайи кас къерех,
Мажбур хьанай паб маса гуз гишин руфунихъ.

* * *
Т1амбул ягъиз ацукьналди, нагъма галачир,
Къведай туш кьуьл ич1и к1вале, далдам алачир.
Гурханадиз ухшар жеда дараматарни
Тек амайдан, къул чимийир хизан авачир.

* * *
Теклифналди, межлисдикни къведай туш вири,
Авазрал рик1 алайбурни жедай туш вири.
Вилер чуькьвез ахъайналди шийирдин юкъуз,
Гьар са жуьре инсанар я, шедай туш вири.

* * *
Бязибуру земземдин яд хъванват1а ви, чил?
Муькуьбуру дадмишнат1а аявшанар туькьуьл?
Я, тахьайт1а, дуьнья, ваз, чун яратмишдайла,
Бес хьанач жал са рик1ерик кутадай къизил?