Вучда вуна?

Ви мурадрал къвана живер
МуркIад кьуртIа, вучда вуна?
Муьгьуьббатдин багъдин бегьер
Терг авуртIа, вучда вуна?

Гъам хъичирдай гьижрандин югъ
АлукьайтIа вучда вуна?
Вилерив хуьз ирид рекьер,
АмукьайтIа вучда вуна?

Жейран хьана зун ви багъдиз
АватайтIа вучда вуна?
Бейхабар яз зун ви вилик
АкъатайтIа вучда вуна?

Лацу лиф хьиз зун ви хурув
АгатайтIа вучда вуна?
Зи рикIик квай цIай ви рикIик
АкатайтIа вучда вуна?

Зи дидардихъ вил галамаз
КъакъатайтIа вучда вуна?