Дагъустан

Шумуд йис тир вун такуна вилериз,
Руша икрам тавуна ви чилериз,
Атайла зун кьил ч1угваз и гатуз вал,
Гьикьван абад яз акуна заз ви гьал.
Къеневай рик1 акъудиз жеч, Дагъустан,
Вун рик1елай алудиз жеч, Дагъустан.

Ви накьвадал к1вач эцигай арада
Муштулух гваз катна са руш чарадан,
Кьакьан синел агакьнай ам марал хьиз,
Аквазавай ам зи рик1ин хиял хьиз,
А руш рик1яй акъудиз жеч, Дагъустан,
Вун рик1елай алудиз жеч, Дагъустан.

Синел алай лацу к1валер акурла,
Махпур хьтин векьерик гъил хк1урла,
Зи к1вачерик звер акатна геренда,
Рик1ини экв гана бирдан беденда
Къеневай рик1 акъудиз жеч, Дагъустан
Вун рик1елай алудиз жеч, Дагъустан.

Хуьрерикай хьана бегьем шегьерар,
Культуради гузва еке бегьерар
Шумуд ч1алан ватан ят1ан, миллетар
Стхаяр хьиз сад я, ийиз гьуьрметар.
Къеневай рик1 акъудиз жеч, Дагъустан,
Вун рик1елай алудиз жеч, Дагъустан.