СтIал Сулейман

Халкьари зун истемишна

Халкьари зун истемшина - 
Лагьай хабар araкьнa захъ. 
Гзаф артух зун саймишна, 
Заз гана лап гегьенш тир ряхъ.

Зун тIалабна гьаник кутун, 
Бахтавар къак зун акатун. 
Хьана зурбаз бахтуни гун, 
Зун лап цIийиз хьана уях.

Хкиз даим мецел Пушкин

Московда акуна суьрет, 
Чир хьана заз ви гьал, Пушкин. 
Ви рахунрихъ чун лап гьасрет 
Яз амукьна цIигел, Пушкин.

Вал къазия хьана дуьшуьш. 
Йисар хьана тамаман виш. 
Эхцигун я вун ярамиш 
Шаирарин кIвенкIвел, Пушкин!

Урус чiалал рахаз тежез

Юлдашари ракъай кагъаз 
Метлеб гъиле гьат хьана заз. 
Ам, ypyc чIал тежез рахаз, 
Са кIус азият хьана заз.

Гьелбет, лагьай а альманах 
Жед лагьай гаф агакьна захъ. 
Юлдашарин хъсан кIвалах 
Ван хьайила, шад хьана заз.

Вири и Ахцегьар сагърай

Кесиб тир и юлдашарин 
Виридан гьа чанар сагьрай! 
Йикъалай - къуз мецер ширин 
Акъатдай куь ванар сагърай.

Хаинарал илигна лаш, 
Гьар са залум авур яваш, 
Вич амачтIан Ленин юлдаш - 
Гьелбетда, хзанар сагърай.

Чуваш миллет шаирдиз

Юлдашди заз орден тебрик 
Авур гьа xaбap агакьна. 
Шаирвиляй вич зав шерик 
Заз гьадан ванар агакьна.

Азиз юлдаш, чуваш миллет, 
Кьабулна за а ви зегьмет, 
Ви чIалар, а пара къимет 
Авай жавабар агакьна.

Орден къачурла

Мубарак тир ихьтин орден 
Лап къадир чиз хвена кIанда. 
Дугъриданни, идан нурдин 
КIаник кваз къекъвена кIанда.

А зегьметар чIугур зурба 
РикIел гьиз чи Ленин буба, 
Гьада къалай рекьяй зурба 
Вили - вилик фена кIанда.

Мад Московдиз

Заз чидай гьал эвел бине 
Вун Урусият я, Москов. 
Лугьуз жед ваз ярум дуьне -  
Гьакьван вилаят я, Москов.

Са заманда атайла фад, 
Акунай заз ина вун мад, 
Гьа вядеда тиртIа вун сад, 
Гила вун кьве къат я, Москов.

Гьар шаирдин вичин буржи

Гьар шаирдин вичин буржи:
Дуьз гафар жагъурна кIанда. 
Юлдашарин чIехи - гьвечIи 
Бейтерал юзурна кIанда.

Мезни кIанда чиз рахадай, 
Гьам векил жен жуван патай, 
Гьар са кардив вичив кьадай 
ЧIалар гьакI туькIуьрна кIанда.

Гевил тух хьана зи

Юлдашари ракъай савкьат 
Акваз гевил тух хьана зи. 
Куьгьнедай амачир такьат 
Къалай - къуз артух хьана зи.

Чанни хьана пара кIеви, 
Какахьнамаз и цIийи ви. 
А эвелдай хайи кефи 
Гила лап ачух хьана зи.

Рикiин ишигъ Гьажибег

Эвела ваз салам - дуьа, 
Зи рикIин ишигъ Гьажибег. 
Къенин къалди зунни сагъ я, 
Кефияр - ачух, Гьажибег.

Гьайиф жез чун чавай яргъа, 
Вучзава зи гъвечIи ваха? 
Минет хьуй, чан руш Зулейха, 
Вуна хъсан хуьх Гьажибег.