ГьажикIа

Уьмуьраллагь зи яшинда
Заз гьич тахьай ван хьана хьи.
ЦIи Куьредиз хупI гишинда,
И кар заз дакIан хьана хьи.

Гьелбетда, булда гьажикIа,
Нез хьун мумкин жедач вакIа.
Тамам Дагъустанда, ЯркIа
Мад адан дуван хьана хьи.

ЧIур хьуй вич акъатай ери!
СтIалар, чIугвамир кири.
КIватI жез Дагъустанни вири.
Пуд манат мизан хьана хьи.

Хъипи машмаш хьиз я тини.
Фан рангни я яру хини.
Сиве турла туькьуьл хинни,
Анал зун гьейран хьана хьи!

Са кIус за авуна дадмиш:
Яд тахъвайтIа жеда бамиш.
Туькьуьлвилиз лап наргимиш,
Им кьифре дарман хьана хьи.

Дад акурла тим жеда тух,
Мумкин авач нез жен артух.
Сарубугъда туна кьулухъ,
Хархардиз майдан хьана хьи.

ТуьтIуьнкай чаз авач чара,
Недайла акIида сара.
Са пай туна хквед хьара,
Гьам чIуру фарман хьана хьи.

Машиндалди бул хкведа,
Теспягьдилай твар екеда.
Заз дакIан затI и уьлкведа
Чи кIвализ мугьман хьана хьи.

Фагьумзамаз идан тегьер,
Гьелбет, гзаф жеда бегьер.
Эрекьни жеч ихьтин зегьер:
Зун тахъвай пиян хьана хьи.

Пул ганач лугьуз ви гъиле,
Авуна заз ихьтин гьилле.
Гьар фу недайла, чи кIвале
Хьайид йикь-шуван хьана хьи.

Вич ктIайд яз, гунуг масан,
Рекьид къаст ян вид зи хизан?
Векьелар Малла Рамазан,
Им батIул дуван хьана хьи.

Гана лугьуз шей аламаз,
Ихьтин кардан бес, ярамаз?
Ви кьилив зун лап аннамаз,
Ахмакь Сулейман хьана хьи.

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.