Лезгияр

Лезгияр – лекь,
Лезгияр – кIел,
Лезгияр – кас
несилрикай
атайди я арадал.
Ахпа абур хьана хел-хел,
Бубайрилай амай эфзел
Къалин руквар
Малар-мулкар,
Гьуьлерин кар
Гьалтайди я гьарадал.
Лекьер дагъда,
КIелер багъда,
Терекдилай Араздал кьван, 
Кевер пата,
Касар гьуьлуьн къерехда
Кьибле пата,
Магъриб пата
мадни гьакьван
Хьайиди я бинедлай,
Абур ина
Агъзур-агъзур йисаралди
Несил-несил
эсир-эсир
яшамиш жез,
Фейиди я дуьнедлай.
ГьакI тирвиляй
Гьелени и тIвар алай
Лезгидихъ пуд хесет ква:
Лекьвал,
КIелвал,
Итимвал.
Ягъийрини
И хесетар чирна михьиз,
вагьшийри хьиз,
Гьужумайд я лезгидал.
Лезги лекь хьиз акурла,
Ажузбур хьиз
къалурайд я чпи чеб.
Лезги кас хьиз акурла,
Ужузбур хьиз
машгьурайд я чпи чеб.
Лезги кIел хьиз хьайила,
Мез-гъвел ийиз,
СикIвал хийиз,
Къачурди я гъилиз ам.
Ахпа кIусни инсаф тийиз,
луматIвилиз,
жаллатIвилиз,
вегьейди я гьуьлуьз ам.
Гьавиляйни
Бубайри тур
чилер гъиляй акъатна,
Йисаралди дувул кутур
чуьллер гъиляй акъатна,
Дагъларин са дереда
Хилер атIай
тар хьиз ама лезгияр.
Гьавиляйни,
гьидан-гьадан
кIвачин кIаник
какатна,
Рехъ алатай
хвар хьиз ама лезгияр,
Харци гатай
пар хьиз ама лезгияр.
Яраб чара авач жал?
Ава.
Чпин дидед чIал
Кьилел кьуртIа тIаратI хьиз,
Кавказда мад вичин чка
хъижервал я лезгидиз.
Амма къени гзафбуру
ахъай тийиз захавал,
Са кIус хкаж хьунни кумаз
ийиз ава
чпинбуруз хахавал...
Маса халкьар акун пис –
Им я пис.
Ачух рекьер,
Шадвални хъвер
Ни чирда кьван лезгидиз?
Анжах вичи!
Эгер таран дувул тамам
туштIа пичIи,
Адакай мад
Емиш гъидай тар жеда.
Чаз икI чида –
(фикир я чи)
Касвал кумай
Лекьвал кIамай
лезгийрикай
Мадни лезгияр жеда.

1984

Рубрика

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.