Гьич нубатсуз чарадалай 

Гьич нубатсуз чарадалай 
Фитне авун къведач виже. -  
Эхир жув аватда виляй, 
Аруш жед ам жуван кIваче.

Гзаф жув жуваз бегенмиш, 
Хьунухь жедач акI ярамиш. 
Яргъи юкъуз гьакI асайиш, 
Йиф атайла жемир гъуьрче.

Терг ая ви ахьтин гьалар, 
А ваз чидай ктIай чIалар. 
Кхьиз чIуру материалар -  
Гьич хъсан туш ихьтин пеше.

Жуван фикир на дуьз гьала, 
Течирбуруз рекьер къала. 
Алад мектебда кIела, 
Чанта, дафтар туна кьуьчIе.

Гьар са касди чара - чараз, -  
«Тамуз якIв яъ, ван хьуй тараз». 
А ваз чидай шахси - гъараз 
Фидай кар туш эхир ише.

Фагьум, фикир кIанда жувахъ, 
Гьар са куьнкай герек уях. 
Мийир вуна кьуру дамах, 
Яна къекъвез гъилер ичIе.

Ленин юлдашдин вичин ряхъ 
За лугьун ваз, гьам мягькем яхъ. 
Гьар гьи касдихъ хьайитIа гьахъ, 
Зерре тахьуй адаз кичIе.

ГьакI чIугваз на кьуру кефер, 
Хъсан жедач гьич са сефер 
СтIал Сулейманан гафар 
Кьамир вуна эже - беже:

I935 - I936

Гафар - чIалар виридан сад, 
Къалай къуз чи гевил я шад. 
Садаз артух я майишат - 
Адакай рахун герек туш.

СтIал Сулейман, ви рикIяй 
Мадни кIватIа фикир чкIай. 
Гьукуматдин хийирдикай 
Яргъал къакъатун герек туш.