Дагъустан (поэма)

Сифте урус падишагьдин 
Хьана сиясат, Дагъустан. 
Гьадан вичин бед темягьдин, 
Чапхунчи ният, Дагъустан.

Гьар са хуьре, гьар шегьерда 
Тваз закон чIуру тегьерда, 
ЦIемуьжуьд лугьур асирда 
Кьунай гьар сергьят, Дагъустан.

Кесибдин зегьмет гьавайда 
Ракъурун тир пачагьд къайда, 
Вичиз муьтIуьгъур чкада 
Тарашиз девлет, Дагъустан.

Нече шумуд йисан къене 
Ряятдин туьд кьуна гъиле. 
Гьар чкада яракь, къеле, 
Гьазурна солдат, Дагъустан.

Гьар са бег, хан кутаз вилик, 
Гьабурув вични жез шерик, 
Дербент вичин агъавилик 
Кутуна, гьелбет, Дагъустан.

Йисан къене вад агъзур кьван 
Къизил пул гуникай рахан. 
Гъилив кьунай Авардин хан 
А Султан - Агьмед, Дагъустан.

Пул гунуглайни мад башкъа, 
Пачагьдинни ханд алакъа,
РикIяй рикIиз чпин мукьва 
Авай муьгьуьббат, Дагъустан.

Иблисдин мез гвай дилавар, 
Вич гишин пехъи жанавар, 
Ирандихъ галаз договор, 
КутIунна меслят, Дагъустан.

Урус Ермолов генерал, 
Кумухарин дуьзенарал, 
Гъил эхцигиз гьа чилерал!
Хьана гьавалат, Дагъустан.

Зегьметкешрин рикIиз зегьер 
Хьана ада aвуp тегьер. 
Къайтагъарин Башлу шегьер 
Авунай барбатI, Дагъустан.

Гьинай вичиз хийир кIвалах - 
Авай патаз гьакI расиз ряхъ, 
Къилбе тереф гьуьлуьн къерях 
Кьунай лап регьят, Дагъустан.

Тарашна кесибрин хуьрер, 
Малар, суьруьяр, нехирар. 
Мад гьелекнай фекъир эллер, 
Хьанай мусибат, Дагъустан.

Мягьтел яда ахъайна вил, 
Гьа дяведиз вегьена гъил, 
АтIана пиристовдин кьил, 
Авунай вафат, Дагъустан.

Верховский фенай саки 
Гьа - гьа дяве ийиз секин. 
Ислягь ийиз хьанач мумкин, 
Хьанай кьулухъ кат, Дагъустан.

II.

Падишагьдин рикIиз серин, 
Дагъустандиз пара ширин,
Вич малла Гьемзетан ерин, 
Жедай тир кIвенкIвел, Дагъустан.

БалIкIандаллаз гьахьтин гьунар, 
Гьар патахъди ийиз чамар, 
Дуьньядиз чукIуриз ванар, 
ЦIайлапандин хел, Дагъустан.

И Шамила чIугур зегьмет, 
Эхир метлеб тир хьи, гьелбет, 
КIватI авун цIийи гьукумет 
Исламдин рекьел, Дагъустан.

Кьиляй кьилди гаф хьана сад, 
Гьа икI тир Шамилан макьсад. 
Падишагьдикай (aв)ун азад 
Игит кесиб эл, Дагъустан.

III.

Гьарда вичиз къизил, гимиш, 
Мад девлет ийиз къазанмиш, 
Бегни, ханни хьанай къизмиш, 
Къалай - къуз хуррам, Дагъустан.

Гьардаз вичиз кlaнз чIехи тIвар, 
Чапхуниз кесибрин затIар.
Къазид хъуьчIуьк кутаз дафтар, 
Фекьидив калам, Дагъустан.

Гзаф хьанай дарам - дурум, 
Сада садаз гудай гьакI рум. 
Дирбаш хьанай «добрым утром», 
Гатанай «салам», Дагъустан.

Куьгьне шариатни закун, 
Гзаф хьана чухун, кукIун. 
Сада садан хзан тукIун 
Хьана гьа макъам, Дагъустан.

IV.

Вич зулумкар падишагьди 
Кесибдин кар ийиз четин,
ЧIур хьана иви халкьдин, 
Хьанчир къатламишар, Дагъустан.

Са замандан тахьай тегьер, 
Къати дяве хьанай бетер, 
Лап гъвечIи аялрин туьтер 
Кьаз, ийиз бамишиз эллер, 
Кьенай инсанар, Дагъустан.

Гьардаз вуч ятIа течиз вуч, -  
Чпин эхир авунай пуч. 
Сибирдиз авунай гьакI куьч 
Амай хзанар, Дагъустан.

Дяве хьанай пара санбар, 
Кьейибур чеб чпел гьанбар. 
Яракь - тIимил тир игитар 
Мад хьанай эзмиш, Дагъустан.

Яракьдиз тушир барабар, 
Къарагъ авур и кесибар, 
Агъузарралд итимар, папар, 
Хьанай мад къирмиш, Дагъустан.

Гьа дяведин эхирариз 
3егьмет ганай фекъирариз, 
Яргъал мензил Сибирариз 
Авунай куьчмиш, Дагъустан.

Падишагьдин ният чIуруз 
Килигдай и кесибариз, 
Девлетлуяр галаз - союз 
Вичиз бегенмиш, Дагъустан.

Кесибдал кьве тахан хамар, 
ЧIугваз таз хажалат, гъамар, 
Фида са кьадар макъамар 
ИкI жез яшамиш, Дагъустан.

Кесибдал акьалжна кьенер, 
Залумариз гана чилер, 
Мад ханар - беглериз чинер 
Авунай багъиш, Дагъустан.

V.

Куьгьне хъилер хьана цIийи, 
Къалхмиш хьанай кесибрин ви, 
Падишагьдал хьана кIеви, 
Вигьиз кIанз къармах, Дагъустан.

Гьа вахтунда, гьа заманда 
Фяле экъечIна майданда, 
Ленин юлдашдин девранда, 
Галаз парти вахъ, Дагъустан.

Балшавикри кьуна гъапа, 
Алахъда кар тухуз зурба. 
Ленинан илим хвена на, 
Кьада цIийи ряхъ, Дагъустан.

VI.

Агъзурни кIуьд виш йисар вад. 
Фялед кIватIда вичин къуват, 
Падишагьдал жез гьавалат, 
Кьаз, ийиз зурзур, Дагъустан.

Чеб чпихъди рикIер кудай, 
Сада садаз гьакI яб гудай, 
Агакьна фяле Бакудай, 
Чанар гуз гьазур, Дагъустан.

Гьелбет, чи Дагъустан гъараз, 
Гьа ибрукай хьанач чараз. 
Фялед вичиз рекьер къалаз, 
Къарагъиз гуз хур, Дагъустан.

Сталин юлдашдин, гьелбет, 
ЭрчIи лув Къазимегьамед, 
Балшавикдин рекье вич мерд, 
Душман ийиз кур, Дагъустан.

VII.

Къастни гьам тир Николаян
Кесибариз гунуг зиян.
Гьар са кеси6 тахъвай пиян, 
Течиз вич - вичиз, Дагъустан.

Чи якIар тIуьр залум гьа - гьа, 
Ахьтин зурба вич аждагьа, 
Девлетлуяр кьадай багьа, 
Кесибар ужуз, Дагъустан.

Нече шумуд - шумуд йиса 
Кесибар, ацалтна суза, 
Малар хьтин гудай маса, 
Вичиз пул къачуз, Дагъустан.

Я гьахъ авачиз, я гьисаб, 
Кесибариз гудай азаб, 
Ахпа хьайид я инкъила6, 
Вияр экъичиз, Дагъустан.

Эхир дуьздиз акъатна сир 
Фялед гъиле гьатна есир.
Вичи авур гьар са тахсир 
Эзберна вичиз, Дагъустан.

Хьана кесибарин макъам 
Гатана ахпа вичин кьам. 
Фялед гъиле гьатна кьван хам 
Гьарнихъ акъажиз, Дагъустан.

Якъин хьана гьа макъамар, 
Къугъун жедай гьа гьакI къумар. 
Кьабулдачир къарар усал. 
Шамил тир беден, Дагъустан.

Рахун къене зирек мецял, 
Дявед къене вуч Рустам Зал -  
Чпин гьа душманрин хамар 
Акъудна тарциз, Дагъустан.

VIII

АвуртIа лап жеда яргъи. 
АкьалтIдач кьиса, Дагъустан. 
Къан са залум къведай пехъи 
Ийиз силисар, Дагъустан.

Кас тежез гъавурда твадай,
Чир тежез чаз дустни мидя, 
Эхир кесибрин арадай 
Кьуна комиса, Дагъустан.

Балшавик юлдашри гьукум, 
Душманарал ийиз гьужум, 
Кесибрикай кьуна ревком, 
Кар чидай таза, Дагъустан..

Юлдашар чеб вафалу тир, 
Чидай гьукуматдин къадир. 
Хкудна яру гвардир - 
Кьве виш милица, Дагъустан.

Чи юлдаш Дахадаева  - 
Гьукуматдин эрчIи лува 
Шуьре къахчуз чIугваз жафа, 
Хьана гьерекат, Дагъустан.

Зегьмет чIугваз гьа арайра, 
Ахтармишна идарайра, 
Меслят сад яз шегьерара 
Фялени солдат, Дагъустан.

Яру цуьквед парникари, 
Дяведин ударникари, 
Чи юлдаш балшавикари 
Кьуна винел пад, Дагъустан.

Фяле, лежбер хьана шерик, 
Крар тухуз вили - вилик 
Петровскан Шуьрен гъилик, 
Гахчуна, Дербен, Дагъустан.

Фялед вичин гьунар чирна,  
Падишагьдин тахтни чIурна, 
Кьунай гьам лап экъуьчарна 
Кьамалай кьаз туьд, Дагъустан.


Вахтуналди Керенский
ЧIехи гьаким тир, Дагъустан.
Николаян закон иски
Мад хъийиз туькIуьр, Дагъустан.

РикI патахъ яз, мез чавди дуьз, 
Ният гьам тир юкъуз - йифиз:
Мад гьа куьгьне гьукуматдиз 
Гузамай фикир, Дагъустан.

Гьич кесибди авур тIалаб
А гафуниз гудачир яб.
КIанид тушир чи инкъилаб, 
Масад тир тедбир, Дагъустан.

Буржуаздвай фабрик, завуд - 
Къахчун тушир адан умуд. 
Кесибдиз регьят тафавут
Жедай кар тушир, Дагъустан.

И Керенскийдин къайда 
Куьгьне закон кьун тир гъута. 
Тунай Ленина халкь гъавурда 
Авунай кар чиз, Дагъустан.

Мез чав дуьз яз, рикIяй мидя, 
ЧIуру таблигъат тухудай, 
Керенский и арадай 
Авунай чукур, Дагъустан.

Русиятдин фяле, кесиб, 
Гьелбетда, чаз ийиз тагьсиб, 
Залумарал хьана гъалиб, 
Абруз гана кIур, Дагъустан.


Мад а Владикавказда
Хьанай са съезд, Дагъустан, 
Гоцинскидиз ийиз сажда, 
Чпиз ислам кваз, Дагъустан.

И фитнедин алишвериш 
Са кьадар акI жеда вердиш, 
Гьич кесибар тийиз саймиш 
Гьа арада тваз, Дагъустан.

Гоцинскид вичин ният -  
Хьунухь тушир чаз гьуьруьят. 
Мягькем яхъ лугьуз шариат 
ЧукIурдай приказ, Дагъустан.

Чеб авам тир фекъирариз, 
Арада гаф къекъуьнариз, 
Андидин дагъдин хуьрериз 
Ракъурдай кагъаз, Дагъустан.

Вичин акси - инкъилабчи, 
Агитаци твадай вичи, 
Вичин а дуст Узун - Гьажи 
Гьа арада тваз, Дагъустан.

Кесибариз ягъун - гатун, 
Вишералди дустагъда тун, 
Чи Советрал гьич кIукI татун 
Тир адан гъараз, Дагъустан.

Ахтармишиз тепе - дере, 
Рехъ тухудай гьа и жуьре. 
Петровскай, муькуь Шуьре 
Къаст тир вичиз кьаз, Дагъустан.

Ийиз ихьтин серенжемар, 
КIватIиз къачагъар - кьушумар, 
Шуьредал ийиз гьужумар -  
Вагьшияр галаз, Дагъустан.


Мад акъатнай и Бичерух -  
Чи рикIин зегьер, Дагъустан 
Ингилисдинд тир а буйругъ - 
Дяведин эсер, Дагъустан.

Галаз вичин пагьливанар, 
Къалуриз чаз вичин гьунар,
Адан кьаст тир чи машинар, 
Кьаз ракьун рекьер, Дагъустан.

Ният хьана гьадан гьакIа, 
Вичиз жед лугьуз чи чка, 
Гагь Шуьре, гагь Петровуска, 
Кьаз Дербен шегьер, Дагъустан.

Каш квай гзаф атайбрук, 
Гьар атайда недай чи руг. 
И Бичерух кутаз хурук 
Агакьнай туьркер, Дагъустан.

Эхир гьа туьркерин ният 
Чпиз кьун тир чи вилаят, 
Галаз чпихъ пара солдат
Са кьадар эфсер, Дагъустан.

Дагъустанда и залзала 
Туп тир туьркверин месэла. 
Кесибариз хьанай бала 
Мадни бешбетер, Дагъустан.

Девлетлудаз ийиз хатур, 
Кесибариз зурзуриз тур, 
Тарковски мад командир, 
Дяведин серкер, Дагъустан.

Девлетлудаз ийиз илаж,
Кесибдиз лугьудай: вун вач. 
Рекьиз туна юлдаш Махач
Гьалдарна нуьквер, Дагъустан.

Душманар хьуй уьзуькъара, 
Чи балшавик тур a cypa! 
Шумуд агъзур гьахьтин тара 
Гъана мад бегьер, Дагъустан.

Вич балшавик яз лап зирек, 
Гьар сад чи властдин дирек,
Буйнакски а Уллубек, 
Чи вилин эквер, Дагъустан.

Эцигна фяле гьукумет, 
Восстанида чIугваз зегьмет, 
Балшавик юлдашрин адет,  
Куьмек яз Централ Комитет, 
Сталин юлдашди, гьелбет, 
Хвена чун эхир, Дагъустан.

Юлдаш Сталина гьада 
ТуькIуьр ийиз цIийи къайда, 
Уллубий юлдаш Шуьреда 
Хьурна чаз векил, Дагъустан.

Терг ийиз къаст гьар са залум, 
АтIун герек абрун кьил - тум. 
Артмиш жез большевикдин тум 
Къалуриз шикил, Дагъустан.

Уллубий вич гзаф машгьур, 
А зегьметар вичи чIугур, 
Гьам кьейила лап хьанай чIур 
Чи рикI, чи гевил, Дагъустан.

XII.

Са залум мад жеда гьазур 
ТIвар яз Деникин, Дагъустан, 
Гьадан къалаз чаз вичин зур, 
Жеда чал кескин, Дагъустан.

Залум гьалтнай чал кIевелай, 
Чи ихтияр къахчуз гъиляй, 
Чун акъудиз и чи кIваляй, 
Вичи кьаз рикIин, Дагъустан.

Юлдашарал алаз чи вил, 
Са гьалдан агакь тийиз гъил, 
Гьар атайда илисиз кьуьл, 
Тунач чахъ мумкин, Дагъустан.

Зур къалун тир адан пеше, 
Кесибарик кутаз кичIе, 
Яна къекъвез гъилер эчIе, 
Чи винел эркин, Дагъустан.

Рахадай гафарни хъилел, 
Гъил, тупIар эцигиз вилел. 
Гьар атайда гьакI чи кьилел, 
Илигна руькуьн, Дагъустан.

Залумарин къалмакъалди 
Гьелекна чун лап и гьалди. 
Балшавик винел жедалди, 
Хьанач чун секин, Дагъустан.

Гьамиша галтугиз катиз, 
ИкI хьанай гьелек, Дагъустан. 
Са гьалдани тежез кьатIиз 
Таб гьим я, керчек, Дагъустан.

Ажуз хьана чIехи-гъвечIи, 
Келлеярни хьана ичIи. 
Экуь дуьнья хьана мичIи, 
Акван тийиз экв, Дагъустан.

Лугьудай мад гьинихъ катин? 
Гьи патахъди рекье гьатин? 
Йикъан садра хьана кIватIин 
КIвалевай рух, пек, Дагъустан.

Чаз чи юлдаш балшавикар, 
Хьана зурба тир куьмекар, 
Чирна чаз чи ийидай кар, 
Халкь уна зирек, Дагъустан.

Чпиз чара хьайи бере, 
Ахпа Табасаран, Куьре, 
Кьуна гъиле якIвни, дегьре, 
Гьам диши эркек, Дагъустан.

Я къужа хьанач, я къари, 
Я куьлуьд хьанач, я ири, 
Хуьруьн зегьметкеш папари 
Гана чаз куьмек, Дагъустан.

Эхир ихьтан гафар, чIалар, 
Къазахарив хьайи гьалар, 
Эвел яна а Агъалар, 
Ахпа Шахшабек, Дагъустан.


Вунан къахчу интикъамар, 
Тамир ви кьисас, Дагъустан. 
Вили-вилик къачу камар, 
Илига кIарас, Дагъустан.

Чаз зиллетар гана гьакьван, 
Чил кIеви яз, цав яз кьакьан, 
Тадачир чи винел яргъан, 
Я кIаник квай мес, Дагъустан.

Душманарин кефи яз куьк, 
ГьакI къекъведай и чи вилик. 
Кесибари гъил ченедик 
Кутаз, кьадай яс, Дагъустан.

Чи балшавик Агъасиюф, 
Гьелбетда, акI ракьиз гьайиф! 
А чун дакIан душманрин кеф 
Вад къуз хьанай саз, Дагъустан.

Гьар атайда агъавилик 
Кутадай чун вичин гъилик, 
Шумудан пай квай чи чилик? 
Вуж тир чи мирес, Дагъустан?

Гзаф хьана алад - хъша, 
Зиллетдик кваз чун гьамиша. 
Себеб вуч тир Hypи Паша 
Хьунухь чаз иес, Дагъустан?

ЧIулав гъуьлягъ кьаз кьулакди, 
Яшамиш жез гьа саягъди, 
Кесибдин эски бапIахдик 
Хьана кьван намус, Дагъустан.

Яшамишрай юлдаш фяле! 
Гьатна азадвилин геле, 
Мягькемдаказ кьуна гъиле 
Чи Совет власт, Дагъустан.


Гьар патахъди гьакI фикириз, 
Кесибрин крар туькIуьриз, 
Залумарин кIвалер чIуриз, 
Гьелбет, кулакрин рикIериз 
Хьана им зегьер, Дагъустан.

КIватIна тагьсиб чпин чандиз, 
ЭкъечIна ибур майдандиз, 
Рехъ къалуриз Дагъустандиз, 
Тамам а кьил Астрахандиз 
ЧIугуна сефер, Дагъустан.

Дагъустандин вилаятар, 
Чаз хьайи зара, зяятар, 
Башламишна гьикаятар, 
ГьакI са - садал эцигиз тIвар, 
Гана гьа хабар, Дагъустан.

Сталин юлдашдин гъараз 
Авайд тушир маса ччараз, 
Гележегдин гьалар къалаз, 
Чи юлдаш Кировни галаз, 
Къалурна рекьер, Дагъустан.

И чи патахъ элкъвена мад, 
Чунни Кавказ хьана мад сад, 
Залумдикай кесиб азад, 
Гьар са фекъир жедайвал шад, 
ТуькIуьрна гьалар, Дагъустан.

Микояна чаз Бакудай 
Пара артух куьмек гудай. 
Чахъди гзаф рикIер кудай, 
Астрахандай чаз ракъудай 
Зурбаз яракьар, Дагъустан.

Идалайни мад алава,
Кесибрин дердиниз дава, 
Къалай - къуз хкажиз гьава, 
Чаз чи юлдаш а Кирова 
Куьмекна санбар, Дагъустан.

И зегьметар чпи къачун - 
Метлеб гьам тир эхир хуьн чун. 
ЦIусад лугьур яру кьушун, 
КIватIна гьа аскер, Дагъустан,

Аслан хьана гьар са батрак, 
Терг ийиз гатIунна кулак. 
Залум Деникинни Колчак 
Акатна фяледин сарак, 
Авуна кукIвар, Дагъустан.

БарбатIна а буржуази, 
Гьар са кесиб ийиз рази, 
Гьар чкада конференци 
Тваз, эцигна тIвар, Дагъустан.

Алахъна гьакI виринара, 
Гьакьван зегьмет чIугваз пара 
Къвез хьана гьа араяра, 
Тайинариз гьар хуьрера 
Селревкомар, Дагъустан.

Куьгьне динни, куьгьне мезгьеб 
Терг авур тир абрун метлеб. 
Кесиб юлдаш рази жен чеб, 
Гьар чкада туна мектеб, 
Гваз къелем, дафтар, Дагъустан.

Кулакар чебни хзанар 
Терг ийиз мискIин азанар, 
Эцигиз цIийи мизанар,  
ГьакI Шуьреда партизанар, 
КIватIна дестеяр, Дагъустан.


Дагъларавай юлдашар чи 
Зиллетдик кваз амай вагьши. 
Вилер буьркьуъ, япар биши, 
Чеб тир гьакI дустагъ, Дагъустан.

И зегьметкеш кесиб эллер, 
Азадвилел алаз вилер,
Чи Советди гана чилер, 
ТуькIуьрнай кIвалах, Дагъустан.

Лежберриз гун вири мулкар, 
Чир хьайила чпиз и кар, 
Шегьерарин балшавикар 
Мукьва хьанай чахъ, Дагъустан.

Дагъустанда фяле тIимил 
ТиртIани, тир акьул камил. 
Душмандиз чап килигиз вил, 
Гьазур тир къуччагъ, Дагъустан.


Хьанай куьгьне залумари 
Дуьнья тарашиз, Дагъустан, 
Садаз хьанайтIани, вири 
ГьакI кIандай вичиз, Дагъустан.

Полковникни, ханни, наиб 
Ажузбурал хьанай гъалиб. 
Къерехдаллай лежбер, кесиб 
Хьанач саймишиз, Дагъустан.

Дуьньядал эхцигна гъилер, 
Михьиз чпиз кьуна чилер. 
Ахпамаз кесибди хъилер 
Хьана хкажиз, Дагъустан.


Залум куьгьне Николая 
Уяхнач лежбер, Дагъустан. 
Залан къалуз вичин сая, 
Тваз гьарай - эвер, Дагъустан.

Малар хьтин ишлемишиз, 
Хийирар къачудай вичиз, 
Кесибарин япар бишиз, 
Буьркьуьз таз вилер, Дагъустан.

Фяле ишлемишиз худда, 
Хийирар кьаз вичин гъута. 
Лежбер юлдашдив аренда 
Багьаз гуз чилер, Дагъустан.

КичIерар гуз тIуб юзурна, 
Ямир, - лугьуз, пара зуьрна,
А залумди гьа икI чIурна 
Кесибрин кIвалер, Дагъустан.

Гъутук кваз акъудиз сухар, 
Твадай чи хамуна нагъвар, 
Ви какахьна вилин накъвар 
Фидай гьакI селлер, Дагъустан.

Начаник вичин куьмекчи, 
Девлетлуяр хуьдай вичи. 
Вичиз куьмек гьар са къучи 
Тир ханар, беглер, Дагъустан.

3егьметдикди гьа - гьа вахтда, 
Уьмуьр фена гьа саягъда. 
Ленин юлдашд авур багъда 
Хьана чаз бегьер, Дагъустан.

Чи эвердиз гьай авуна, 
Кесибдал сир пай авуна, 
Сталина сагъ авуна 
Чи куьгьне хирер, Дагъустан.

Партийни юлдашрин икьрар 
Чун азад жез авур къарар:
Дагъустанда газ фанарар 
КуькIуьрнa эквер, Дагъустан.

Лежбердин фяледин луькIуьн –
Хуьнуьх хьана чи кар туькIуьн. 
Йикъалай - къуз хьана секин 
Кесибрин рикIер, Дагъустан.

Куьгьне чанар хьана дири 
Чи ажуз юлдашар вири. 
Гъана цIийи къелемари 
Гъана яру цуьквер, Дагъустан.

Чи як нез, ви экъичарай 
Куьгьне залум экьуьчарай, 
Ворошилова вердишарай, 
Йикъалай - къуз яшамишрай 
Чи яру аскер, Дагъустан.


Сир сад тир чав вичин рикIин, 
Метлеб тир чи крар туькIуьн, 
Чи дирбаш Орджоникидзени 
Тир чи далу дагъ, Дагъустан.

Яру партизан юзана, 
Душмандин кьушунар хана, 
Залумрин кьилел регъвена 
Мад а яру регъв, Дагъустан.

Душманарив гваз эгечIна, 
Гзаф зурбаз бажармишна, 
Асланри хьиз къутармишна 
Чпин чанар сагъ. Дагьустан.

Дяведин мих ийиз барчим, 
Душманарал ийиз гьужум, 
Юзана чи яру кьушун, 
Ийиз дарбадагъ, Дагъустан.

Советдин кIвал авур устIар, 
Сад авур вири миллетар. 
Чара - чараз тутуна тIвар, 
Социализмад зурба юрдар 
Кьакьан жез артух, Дагъустан.

Авар, тат, урус - вири мад, 
Авайра гъараз аман мад. 
Ватан СССР ийиз абад 
Алахъна чун вири яз шад, 
Акъваздач кьулухъ, Дагъустан.

Тамам вири Урусият, 
Терг ийиз куьгьне хасият, 
Чириз цIийи эдебият.
Чи тIуьн - хъунни, кеф - кефият 
Хьанава буллух, Дагъустан.

Чи варлувал виликди шуз, 
Яшамишвал артух къачуз, 
ТуькIуьрна балшавик калхуз, 
Авун кьадач лежбер ялгъуз, 
Цаз буллух къуьл - мух, Дагъустан.

Чи якIвар тваз вичин сиве, 
Жакьвадай гьа пехъи деве, 
Гьатзамач чун гьич а кIеве, 
Сталин юлдашдин хиве 
Хьана чун хуьнуьх, Дагъустан.

Агакьна чахъ цIемуьжуьд йисан 
Ширин емиш багъ, Дагъустан. 
Вич рикIиз хуш пара хъсан 
Цуькведин яйлах, Дагъустан.

Буш гаф гьич рахан тийидай, 
Гьахь гвайдан кеф хан тийидай, 
Даиман юзан тийидай 
Арнавутдин дагъ, Дагъустан.

Чи арада ислягьвал тур, 
Регьятвилин план чIугур, 
Кесибарин вилерин нур, 
Экв гудай чирагъ, Дагъустан.

Мад амач чаз мичIи йифер, 
Гьатнава чаз и хуш сефер. 
Алатна а чIулав цифер, 
Акуна чаз рагъ, Дагъустан.

Тваз гьа дяве эвер - гьарай, 
Чи залум душманар ширай, 
ЧIехи юлдаш яшамишрай, 
Уьмуьр мин - будагъ, Дагъустан.

Ленин юлдашдиз крар чиз, 
Душманар авуна ажиз, 
Кесибарин кIвалахар хуьз, 
Чи кьилер авурди виниз 
Я яру пайдах, Дагъустан.

Лап машгьур я а вичин тIвар, 
Пролетар инкъилабдин устIар, 
Сталин я юлдашдин тIвар, 
Дуьньядикай тир хабардар - 
Гьамиша уях, Дагъустан.

Ленин юлдаш рекьидайла 
Чаз веси авуна, Дагъустан. 
Чна гьам гьакI рахадайла, 
Фикир чIугуна, Дагъустан.

Гьарда вичин тIуб ийиз кIас, 
АлукIна лап чIулав либас, 
Руссиядин кесибри яс 
Юлдашдихъ кьуна, Дагъустан.

Ада (а) къудай гьар са къарар, 
Чун амайбур хьана икьрар, 
Адалай кьулухъ артух крар 
Вилик ракъана, Дагъустан.

Гьар садан рикI хьана уьтквем, 
Са гафни гьич тавуна кем, 
Партид рекьел хьана мягькем, 
А роль къугъвана, Дагъустан.

Вич амачтIан, гьелбет, ама, 
Дегиш жеч ада лагьай фурма. 
Артух ийиз социализма, 
Чун гьакI гатIуна, Дагъустан.

Яб гуз гьадан весийриз, 
Тухуз гьабур лап дуьз кьилиз, 
Сталин юлдашди кIевиз 
Гьа чка кьуна, Дагъустан.


Фагьум ая Шуьре район, 
Анин дезгагь авай уюн. 
Буржи я ви фагьум авун 
Гуьзет гьа калхуз, Дагъустан.

Юлдашарин чпин акьул, 
Сада садаз чIугвадай къул, 
Сталин юлдашдин аул - 
Я гьадан тIварцIиз, Дагъустан.

Анин а итимар, вахар, 
Аку абурун дамахар. 
Артух хьунухь а кIвалахар - 
Kap авун я чиз, Дагъустан.

Юлдашарин чпин метлеб 
Ударникар хьунухь я чеб, 
Хъсан школани мектеб, 
Тарсарни кIелиз, Дагъустан.

Къарамаларни балкIанар, 
Чпиз ядай музыканар, 
Хъсан - хъсан ширин ванар, 
Ягъиз гьар гьаваз, Дагъустан.

Гьелбет, чпин жегьил чагълар, 
Кьуд патахъди таза багълар. 
Йикъалай - къуз чпин гьалар 
Жез гьакI хкажиз, Дагъустан.

Буржи крар чпин хивяй 
Куьтягьна акъудна кIевяй. 
Хъсан нез - хъваз столовай, 
ГьакI кефер чIугваз, Дагъустан.

Къизил мяден, яру гевгьер, 
Калхузрикай чIугваз жевгьер, 
Виринариз вичин пример 
Гьазур я къалаз, Дагъустан.

КIандатIа квез ам чир хьана, 
За къалун квез гьа замана:
Сталин, чи вождь атана 
Гваз зурба къуват, Дагъустан.

Фикир вичин лап дерин гьуьл, 
Фяле халкьдин я вич кьил, гъил, 
Дуьньядиз экв гузавай вил 
Гваз зурба къуват, Дагъустан.

Кесибдин гаф рахаз ише, 
Чирна гьардаз вичин пеше, 
Дагъ - Огнида хъсан шуьше 
Акъатдай завод, Дагъустан.

Гьардаз вичин кеспи чирна, 
ЧIуру крар мад туькIуьрна, 
Шуьреда чаз мад консервна, 
Завод - имарат, Дагъустан.

Терг авуна куьгьне малик, 
Какатна фяледин гъилик 
Тагъиеван чкIaй фабрик, 
Гана чна худ, Дагъустан.

АтIана дереяр, чархар, 
Чуьллериз яд тухуз apxap. 
Виш пай артух чи кIвалахар 
Хьана тафавут, Дагъустан.

Чи властдин и башарат 
Гергебиль хьтин имарат, 
Абад ийиз чи майишат, 
Хьанайни пачагьдин ният 
Гьа затI арасиз, Дагъустан?

Къалай-къуз техника, устIар, 
Артух хьунухь я чи затIар, 
Нефтегавань я гьадан тIвар, 
Лап Бакудай къведай нафтIар 
Тракторра куз, Дагъустан.

Агакьна чахъ цIувад йисан 
Чи дирибаш сувар, Дагъустан. 
Вилик лукI тир гьар са инсан 
Хьанава уях, Дагъустан.

Зегьметчийрин кеф хьана куьк, 
Яшайишвал физ гьакI вилик. 
Тадач чна крар эксик, 
Гьа сувар я за квез тебрик 
Ийидай лайих, Дагъустан.

Залумарин агьузарар, 
Чпел элкъвена азарар, 
Кьурай мецерни пIузарар, 
Квахьнавайд тир чи суварар, 
Хьана мад ачух, Дагъустан.

Гьа югъ рикIел хуьх вуна ви:
Чал контрол алай кIеви, 
Залумри хъвадай чи иви, 
Тан жедачир я чи цIийи, 
Я чи руфун тух, Дагъустан.

Фяле - лежбер хьанай цIигел, 
Жигъин тийиз гьич регьят гел, 
Гьар са кесиб хьанай бейгьал. 
Дикъетдивди гьа ви рикIял 
Гьа замана хуьх, Дагъустан.

Бег, хан акурлахъди, зурзаз, 
Руьгь экъечIдай кьилин кукIваз, 
Нагагь ада авур пирказ, 
Мумкин тушир ийиз отказ - 
Залумдин буйрух, Дагъустан.

Йикъан садра гъенел дилмаж - 
Лугьудайд тир: ви дигьек гъваш. 
Нагагь вун хьайитIа яваш, 
Къуз вадра кавхадин къирмаж 
Галукьдай кьилихъ, Дагъустан.

Залум пачагь ахьтин чIехи, 
Гъилер кIвачер хьурна гъуьргъуь, 
Абрун вилер уна буьркьуь,
Чна рехъ расна чаз гьяркьуь. 
Авуна мягькем, Дагъустан.

СтIал Сулейманан къайда 
Буш рахун туш гьакI гьавайда, 
Нубатсуз гаф ийич ада. 
Нагагь гилан гьакI амайтIа, 
Чи гьал тир язух, Дагъустан.

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.