Къуруш

Булутрикай хкажна кьил,
На ракъинив вугузва гъил.
Чин ачух яз, шад яз гуьгьуьл,
Бахтарив ацIанавай хуьр,
Дуьньяда тIвар-ван авай хуьр.
Хайи Къуруш, диде - Ватан!
Вилерин нур зи ширин чан!
Хам яйлахра суьруьяр бул,
ХупI гуьзел я мезредин тIул!
Юкьва аваз гимишдин чIул,
Хунча хьиз чIаганавай хуьр,
Цуькверив диганавай хуьр.
Хайи Къуруш, диде - Ватан!
Масан я чаз ви гьар са къван!
Алимрин сан-гьисаб авач,
Тарих гьакьдай ктаб авач!
Ви суалриз жаваб авач,
Намусни виждан авай хуьр!
Шадвални девран авай хуьр!
Хайи Къуруш, диде - Ватан!
Багьа я чаз ви гьар са къван.
Ви рухваяр къе гьар сана,
Ава гьар сад са кард хьана.
Вун мад вине кьада чна,
Къе чал абур гъанавай хуьр!
Элдиз машгьур хьанавай хуьр!
Хайи Къуруш, диде - Ватан!
Темен це заз, кьуна гардан!
Кьакьан дагълар - арха ава,
Зирек, уьтквем вахар ава.
Дуьзенда вахъ стха ава.
Дердериз дарман авай хуьр.
Аллагьди чаз ганавай хуьр!
Хайи Къуруш, диде - Ватан!
Чи намус, чи михьи виждан!
Са пад вацI я, са пад гуьне,
Лекьери лув гузва винел.
Лезгистан я ери - бине,
Дустариз майдан авай хуьр!
Душманриз тIурфан авай хуьр!
Хайи Къуруш, диде - Ватан!
Кхьида ваз за виш дастан!
Чи пIузарал хуш хъвер хьурай!
Гьар са кIвале мехъер хьурай!
Жигъиррикай рекьер хьурай!
Кьуд патай мугьман авай хуьр!
Виш асирра ван авай хуьр!
Хайи Къуруш, диде - Ватан!
Йикъалай-къуз хьуй авадан!

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.