Нариман Къарибов

Дербент масан

Гзаф чкайра къекъвей кас я зун,
Куьчери элдин векил инсан яз,
РикIел аламатIани Парижни Лондон,
Зун патал къадим Дербент масан я.

Бакуда кIелна, мухбирвал чирна,
АкуначтIани и кар асант яз.
Гур Тегьрандини ганатIан чим, наз,
Зун патал къадим Дербент масан я.

Самур

( ПАШМАН ШИИР )
Са халкьдин арада часпар хьанва вун,
Авахьзавайди яд яни, накъвар?
Мусалди икI жеда? Бизар хьанва чун?
Лепейрин елкенра гьатна гужлу гар,
Рехъ атIуз фидай вун мукьваллатIа вахт?
ВацI, вун чи девлет я, я чи шагьдамар.
Азадвал кIани элдин садвал, бахт.

Зи дуст

Кьабул на зи саламар -
Зи чарарин хара, зи дуст.
Гьелелиг зун я саламат,
Дертлу ятIан пара, зи дуст.

Эркин рикIин пад амач захъ,
Дигин хъийир гад амач захъ,
Виликдай хьиз авахьзавай
Чар булахдин яд амач захъ.

Гена са йиф акъатна, яр...

Гена са йиф акъатна, яр -
Вун галачир йиф,
Зун пенжердив агатна, яр,
ЧIугваз ви гьайиф.
Акуна заз пIинидин тар
Юзуриз гару,
Хилел алаз гьа ваз ухшар
Тек амай кару.
КьатIана за: сефил тир ам -
Лап зун хьиз сефил,
За чIагъандай яна макьам

Къуруш

Булутрикай хкажна кьил,
На ракъинив вугузва гъил.
Чин ачух яз, шад яз гуьгьуьл,
Бахтарив ацIанавай хуьр,
Дуьньяда тIвар-ван авай хуьр.
Хайи Къуруш, диде - Ватан!
Вилерин нур зи ширин чан!
Хам яйлахра суьруьяр бул,
ХупI гуьзел я мезредин тIул!

Хайи хуьруьз

Гатфарин вахт, къацу синел ацукьна,
КIватIна рикIиз агъзур жуьре фикир шад.
И чкайрал уьмуьрдал хьиз ашукь яз,
Хайи хуьруьз бахшзава за шиир мад.
И хуьруьн гьар къван заз чан хьиз масан я,
Алванрикай рахадач гьич мезредин.
ГуьтIуь куьче заз шегьер хьиз хъсан я.