За лугьун квез са пис папан агьвалат.
Яргъал акъваз, вал фасад дуьшуьш жеди.
Гьич алатич уьмуьрда а хажалат,
А савдадал вун лап ягъалмиш жеди.
Па6 - гъуьл хьайтIа, тежез хьайтIа гьуьрметар.
Квез герек я мад а мехъер, зегьметар,
Гагь макъамда дишегьлидин къиметар,
Вуч кIантIан хьуй, манатар вад виш жеди.
Зид лугьун я: гатIунмир вун сифтедай.
Кал туш хьи ам гуз - къачудай гьафтедай.
Агална раж куьлег туна чефтедай,
Кьил туькIвейвал къуншидиз дуьшуьш жеди.
Килигзамаз чинай яз вич иерди,
Гаф лагьайла жава6 гуз пис тегьерди,
Ахьтин дад гуч гьич са агъу - зегьерди, -
Сиве тваз жеч, ам лап наргимиш жеди.
Акур бере жуваз адан амaлap,
Рахкурда лугьуз ийиз вуна хиялар.
Акур бере къулав куьлуь аялар
Гьар патахъ физ рикIни ви тешвиш жеди.
Вучда вуна гьа папакай, хцикай?
ГурцIул тушни эхир жедайд кицIикай?
Кефни хана жуван гьадан мецикай,
Азар тушиз чанни ви пузмиш жеди.
КIантIа рахух вун гьадавди мецелди,
Гъил хкIуртIан экъечIиз физ варцелди,
Чинебан сир акъудда ви къецелди,
Нар деве хьиз вич вичиз къизмиш жеди.
Гьикьван гайтIан вуна адаз несигьат,
Я терг ийич а фасикьди хасият.
Даимди жеч алат тийир азият, -
Ам муътIуьгъ жеч, эхир жув вердиш жеди.
Гьич кьиле фич а пис папав луькIуьнна,
Гаф лагьайла, физ акъвазда рикIина.
Лугьуд вуна: гъаначиртIа кешкина!
Гьакьван бетер пис ахмакьдин руш жеди.
Квез я a паб гъуьлуьн кефи акI хадай?
Вядедамаз акъуд ви гъил яхадай.
СтIал Сулейман вич зурбаз рахадай,
Вичин паб икьван гзаф пис туш жеди.
Добавить комментарий