Мусибатдин кьуьд хьана хьи

Юлдашар, им ажеб зурба 
Мусибатдин кьуьд хьана хьи. 
ЦIинин живер авай турба 
Кьве кьилни гъуьргъуьд хьана хьи

Чилерикай хьана ракьар, 
Ажуз хьана кесиб халкьар. 
Сифтегьан рагъ элкъведай къар 
Гьарма са пехъид хьана хьи.

КIарасарни хьана эксик, 
Мумкин авач гъил кягъиз цик. 
ЦIинин хъуьтIуьз хьайи и цIиг - 
Им мадни мекьид хьана хьи.

Гьар садан рикI хьана тешвиш, 
Квахьун хьана хьи чи ериш. 
Мадни бетер хьана и чиш  - 
Им чуру рехид хьана хьи.

Багъламишна михьиз регъвер, 
Мурк хьана къекъведай рекьер, 
Яралай вилик квай кьугъвер, 
Им мадни чIехид хьана хьи.

Чир жезамач бахча, я багъ, 
Сад хьанава дерени дагъ. 
ЦIинин хъуьтIуьз къведай и рагъ 
Кьве вилни буьркьуьд хьана хьи.

Лежбер юлдашарин гафар:
Мус къведа луз цIинин гатфар?
Гьайванариз и алафар 
Дуьгуьдлайни кьит хьана хьи.

Сулейман, на мийир гьарай, 
Герек туш вун, гила къарагъ. 
Акъуд тежез им ракIарай, 
Им къуьнер гьяркьуьд хьана хьи.

I926

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.