Я кьван карван - сара...

Чир хьана заз гила: дуьнья 
Я кьван карвансара, юлдаш! 
Чаз гьуьруьят къачур Ленин 
ГьикI твада бес сура, юлдаш?

Вил вегьена кьулухъ, вилик, 
Чун физавай рекьиз килиг, -  
Чаз слабуд къачур шерик 
Хьана чавай чара, юлдаш.

Мез фасагьат, рахун зирек, 
Фекъир - фукъарадин куьмек. 
Амач гьукуматдин дирек, -  
АлукI либас къара, юлдаш!

Экуь къакай хьана чаз йиф, 
ЧIугвадай кьван Ленин гьайиф! 
Гьар гьи бенде ятIа ариф, 
Тамам я ишара, юлдаш.

Московдай чаз атай телер, 
Дегиш хьана чи шад гьалер:
Чи виниз яз авай кьилер 
Гьатна гила хура, юлдаш.

Чаз мусибат хьана къарши, 
Экуь вилер хьана мичIи, 
Лежбер юлдашарин уьлчи
Амач хьи ашкара, юлдаш.

Фагьумзамаз ихьтин гьалер, 
Хъунухъ лазим я чаз зегьер. 
Терг хьана чи багъдин бегьер 
Яна гила цIара, юлдаш.

Жедалди чаз ихьтин хабар, 
Биши хьун хъсан тир япар. 
Чи далудал хажалат пар 
Хьана гила пара, юлдаш.

Фекъирарин шагьларин шагь, 
Фяле юлдашарин панагь 
Югъди - йифди на чIугу агь, 
Яхъ жуван тIуб сара, юлдаш.

Багьри бугьитI, фикир - умман 
Чи сагьиби агьли фарман. 
Фекъиррин дердинин дарман, 
Вуж хьуй агьли чара, юлдаш?

Чир хьухь квез мад гьадаз ухшар 
Къвазнава къаншарба - къаншар:
КичIе жемир мад емишар 
Гъида гьахьтин тара, юлдаш.

Хурун илим авай дафтар - 
Сулейманан рикI хьана тIар. 
Камал гьуьл тир, вич арифдар, 
Кьена чи фукъара, юлдаш.

I924

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.