Амач хьи

Я рабби, чи бязи рекьер, 
Эвел хьиз, гьяркьуьз амач хьи. 
Акъатиз чанариз гьекьер, 
Хамарин(и) эхиз амач хьи.

Гагь Бичерух, гагь Деникин 
Къвез, атIая хьи чи мумкин. 
Чаз шафагьат къведай рикIин 
Мягькем я, гъуьргъуьз амач хьи.

Акуниз - инсан вижевай, 
Хуьз жезамач вич вичивай. 
Вуч атайтIан рахаз сивяй, 
Чинариз регъуьз амач хьи.

СикI хан хьана, дере халват, 
Бязибуруз жез хажалат. 
ТIвар мусурман - терки салат, 
Чин бегьем чуьхуьз амач хьи.

Гьарда жуваз хийир - зарар 
Течиз, экъис изва сарар. 
Фагьума: асландин чIарар, 
Эвел хьиз, векъиз амач хьи.

Гъам - хажалат хьана пара, 
Амач чи дердиниз чара. 
А виликан хурмад тара 
Гила бегьер гъиз амач хьи.

Бязи инсанарин ният 
Терг авун я калам, аят. 
Эй мубарак чи шариат, 
Эвел хьиз, яргъиз амач хьи.

Эй, Сулейман, и ви арза 
Я гуз жеч, я къачуз маса. 
Секинз акъваз, гила беса, 
А къар чаз жагъиз амач хьи.

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.