Жедайд туш

Аллагь - талед вичин къелем 
Масадвай чIугваз жедайд туш. 
КIватI хьайитIан жумле алем, 
Гъейридаз акваз жедайд туш.

Я вахт авач вичихъ, я сят, 
Вичиз гудай са насигьат. 
Гьелбет, адан вичин меслят 
Масадвай жузаз жедайд туш.

Я шикил авач, я суьрет, 
Гьич са куьнихъ туш вич гьасрет. 
Валлагь - биллагь, вичи нуьсрет 
ТагайтIа, агъваз жедайд туш.

Я ацукьдайд туш, я къарай, 
Я эвердайд туш, я гьарай. 
Гьикьван хъуьтIуьз хьайитIан къай, 
Мекьи яз аяз жедайд туш.

Гьич са касдихъ жеч а ерин,
Я шел къведайд туш, я хъуьруьн.
Даим эбед акьул дерин,
Я са кIус даяз жедайд туш.

Раббел - алемин я ама, 
Лугьуз жез туш вичин фурма. 
Я нуьквер, гъейри жандарма, 
Вич куьмек галаз жедайд туш.

И замандин алимдихъ хьиз, 
Гьич са гъейри итимдихъ хьиз, 
И гьукумат гьакимдихъ хьиз, 
Вичив дамах, наз жедайд туш.

Гьар чIалалди лугьуз са тIвар, 
Авайд я вич мужизатар. 
Гьелбет, адан вичин кьадар 
Кьуна кьулухъ таз жедайд туш.

Падишагь вич бейвилаят, 
Сагьиби Кьуръандин аят. 
Вичин рикIе чIуру ният, 
Гьич маса гъараз жедайд туш.

Гьелбет, адан къанни цIуд жуз 
Кьамир, бенде, пара ужуз. 
Са касдинни гъиляй ажуз 
Хьана, ам гатаз жедайд туш.

Эй, Сулейман, и ви фикир 
Даим эбед ая зикир. 
Аллагьдилай гъейри, шуькуьр 
Ам гьич масадаз жедайд туш.

I9I6

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.