Кстах сусан мани

Кеф-кефина бубад к1вале
Гьазурди нез авай тир зун.
Мамад патав къад сан къене,
Низ акур  тир к1валах авун.
Гила зи гьал хьанва ч1уру,
Герек жезва зегьмет ч1угун.
Яб це, вахар, дерт пара я,
Заз са тахьай кар хьана хьи,
Гъуьлуьз атай йисан къене
Закай кьурай тар хьана хьи.
Гъуьл я лугуьз са бендуьгуьр
Кьац1анвай сад хквед к1вализ,
Бязи ч1ауз гьа ферсизни
Пиян хьана катда йифиз.
Са вичиз ваъ, идаз, адаз,
Фида пулсуз к1валах ийиз.
Я чан, вахар, дерт  пара я,
Зи к1валин юкь ч1ур хьана хьи,
Гъуьлуьз атай йисан къене
Заз к1валикай сур хьана хьи.
Вацра садра мажиб хкиз
Виш манатар вахкуда зав.
Гьадакайни паяр къачуз
Катда вичин дидед патав.
Са бахт авай свас тирт1а зун,
Хцин диде гьалтдайни зал.
Яб це, вахар, дерт пара я,
Зи дидедиз гуч хьана хьи,
Шегьер туна хуьруьз атай
Зи жегьил чан пуч хьана хьи.
Пудра, духи вич амай туш
Бульвар!Зи чан вун гьинава?
Хуьруьз атай заз хьана гуч
Зи рик1 къене мур хьанава.
Жегьеннемдиз ихьтин гъуьлер,
Зун шегьердин дердинава.
Я чан, вахар, дерт пара я,
Заз аламат кар хьана хьи,
Гъуьлуьз атай йисан къене ,
Закай   кьурай  тар  хьана хьи.