Угъридин кьилел цlай

(Зи рикl алай писатель Р.Гьажидин къейд хьтинди)
Хквезва зун кимин патав гвай рекьяй тlуз. Кимеллайбуруз салам гана, давамарна за жуван рехъ.  Кимел санбар ксар алай. Хъуьтlуьн чlав тирвиляй я. Кар-кеспи авачир хъуьтlуьн вахтунда лахъут гатадайбур, къумарал къугъвадайбур…
Са шумуд кам давамарайдалай кьулухъ, «яда, яда, акъваз анал!» лугьур келима галукьна зи япарихъ. Элкъвена зун кьулухъ. Немсерал гьужумдай тегьерда зи терефдихъ гьерекатзава са агьил итимди. Са яракь тир адан гъиле кемиди. Агакьна ам зи патав. Къалабулух квай.
-  Яда, а газетда чапнавай «Плагиатар» тlвар алай юмореска вуна никай кхьенвайди я? – суал гана заз агьилди.
- Плагиаторрикай, - атlай жаваб гана за.
- Плагиатрикай яе… Амма на низ лугьузвайди я плагиатар?
- Гьикl низ? Чарадан яратмишунар чуьнуьхзавайбуруз.
- Вуна плагиатор заз лугьузвайди яни? – тарцел алкlанвай шкьакь хьиз, алатзавач агьил кас залай.
- Ви тlвар Кьасумбег яни?
- Ваъ.
- «Цlегь тlуьрдан кьилел цlай ала» лугьун я види. Зи юморескадин игит Кьасумбег я. Ви тlвар авачиз хьайила, бес вуна жузунин себеб вуч я? Куь секинсузарзава вун? – суал гана за.
- Мад кхьин хъийимир ахьтин юморескаяр. Ам дуьз кар туш, вуна авунвайди.
- Огьо, жеч ман дуьз кар! Бес вуна Севзихановадин новеллаяр, гьикаяяр кьилер дегиш хъувуна хьиз, жуван тlварцlихъай газетда чап хъувун дуьз яни? Агьа-а-н, зун ви гъавурда гила акьуна. Ваз кьуьзуь кьиляй машгьур жез кlанзава ман! Чарадан бажарагъдалди! Чарадан эсерралди! Хьана, заз мажал авач, - лагьана, рехъ давамарна за жуван.

Куругъли ФЕРЗАЛИЕВ

Рубрика

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.