С.Сулейманан шииратда камаллу, таъсирлу келимаяр

Чпин зурба, къешенг эсерралди хайи халкьдин руьгь хкажзавай, гуьгьуьлар хуррамзавай бажарагълу ва сейли шаиррин пак тlварар тарихдин къатара эбеди яз амукьда. Лезгийрин машгьур шаиррин, зарийрин эсерра гьалтзавай камаллу, таъсирлу келимайри, ибарайри зи фикир чпел желбзава. Иллаки чи классикрин яратмишунра итижлу, камаллу келимайри, афоризмайри кьетlен чка кьазва.
Лезги халкьдин машгьур шаир, «ХХ-асирдин Гомер» Стlал Сулейманан эсерра авай кьван камаллу ибарайрихъ, итижлу, дерин манадин келимайрихъ и кьил а кьил авач. Лезги халкьдин нуфуз мидаим яз хкажай камалэгьлидикай республикадин, уьлкведин тlвар-ван авай писателри, шаирри ва маса сейли ксари лагьанвай фикирарни таъсирлубур я. Гьакъикъатдани, Стlал Сулейманан тlварцlел чи халкьди несилрилай несилралди дамахда.
Арифдардиз «ХХ-асирдин Гомер» тlвар гайи урусатдин машгьур къелемэгьли Максим Горькийди  «Сулеймана яратмишзавай хьтин шииратдин гевгьерар арадиз гъидай зигьин авай ксар хуьх куьне», гьавайда лагьаначир. Эдебиятдал рикl алай чи  халкьдин нуфузлу ксари шаирдин яратмишунар чlехи хазина хьиз хвена ва халкьдив агакьарна. Ингье къе чна классикдин къиметлу эсерар дикъетдивди кlелни ийизва, абурукай лезетни хкудзава.
Шаирдин эсеррикай, алай аямдин хьиз, шаксуз,  къвезмай аямрин кlелчийрини лезет хкудда. Адан насигьатарни камаллу келимаяр алай макъамдани важиблубур, герекбур яз гьисабзава.
Агъадихъ чна арифдардин эсеррай къачунвай фикир желбдай, кесерлу келимайрикай са кьадарбур кlелзавайбурун фикирдизни гъизва.

Куругъли ФЕРЗАЛИЕВ,
«Эренлардин сес» газетдин корр.

Я рабби, чи бязи рекьер,
Эвел хьиз, гьяркьуьз амач хьи.

Ша, жемир вун акьван авам,
Амукьда кьулухъ, мусурман.

Батlулдаз гьахъ лугьуналди,
Яд гъиз жеч гьич сафуналди.

«Сагъ хьуй» лугьун «досвидани»
Им маса саягъ хьана хьи.

Хупl бул хьана эрекь, духан.
Пиянбурув чун  гьикl рахан?

Гьар намерддиз гуналди пул,
Дережа гьуьндуьр жедайд туш.

Тежер кардал чlугваз зегьмет,
Алахъмир вун, я беймирвет.

Кьве кlвачел къекъведай маймун,
Ахьтин уюнбаз герек туш.

А виликан хурмад тара
Гила бегьер гъиз амач хьи.

Вад кицl аватналди гьуьлуьз
Адан яд кьалу жедайд туш.

Гьакl нубатсуз экъисиз кьам,
Чидач ваз рахадай макъам.

Дамах жеда бязибуруг,
Ажуз кесиб кутаз хурук.

Гафар пара ширин къалуз,
Ришвет къачуз, руфун дулуз.

Иер фагьум ая вуна,
Нубатсуз луькlуьн хъсан туш!

Рубрика

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.