Захъ Лезгистан уьлкве ава

Дуьньяда тIвар авай машгьур,
Ахьтин уьлкве ая жагъур.
Душманриз чи гъайи кьагьур
Захъ Лезгистан уьлкве ава.
Шиш кукIушрин кьакьан дагълар,
Ширин нямет авай багълар.
Ийизвай гьар сада ялвар
Захъ Лезгистан уьлкве ава.
Рехи лепе Каспий гьуьлуьн,
Дамах язвай къе чи кьилин.
Къадир авай хайи чилин
Захъ Лезгистан уьлкве ава.
Гьар са жуьре тамар авай,
Бул булахар, кIамар авай,
Рушар юкьва камар авай
Захъ Лезгистан уьлкве ава.
Чарадан мал къакъуд тийир,
Гьарамдин затI агуд тийир,
Пелелай бугъ алуд тийир
Захъ Лезгистан уьлкве ава.
ЧIехибуруз гьуьрмет авай,
Надинжбуруз туьгьмет авай.
Асландиз хьиз жуьрэт авай
Захъ Лезгистан уьлкве ава.
Шаирариз гузвай илгьам,
Пехилбуруз ядай галтIам,
Чидай писни хъсан улам
Захъ Лезгистан уьлкве ава.
ЧIулав куьрни балугъ къизил,
Атир гьава чандиз кьезил,
Гуьгъуьналлай бахтлу несил
Захъ Лезгистан уьлкве ава.
Душманризни чIуру тир кар
Хьана такIан авай халкьар,
Мецел алай Аллагьдин тIвар
Захъ Лезгистан уьлкве ава.
Гьисаб тежер вичин яшар,
Лап женнетдиз тир вич ухшар,
Кьуд пад - абукевсер ятар –
Захъ Лезгистан уьлкве ава.
Къужахдавай тик дагъларин,
Халис макан сал-багъларин,
Арадавай дуст халкьарин
Захъ Лезгистан уьлкве ава.
Къизилдин къум экIя хьанвай,
Лацу мекер пеле авай,
Каспидални дамахзавай
Захъ Лезгистан уьлкве ава.
Яшлу Шалбуз - далу галай,
Урусият - халу галай,
Пара рази тир вичелай
Захъ Лезгистан уьлкве ава.
Шуршур ийиз вацIар, кIамар –
Авахьзавай гимиш камар,
Къачузавай вилик камар
Захъ Лезгистан уьлкве ава.
Яйлахар бул мал-къарадив
АцIанва. Дамах гвач халкьдив.
Кар авачиз тавур къал-къив
Захъ Лезгистан уьлкве ава.
Гьар са пипIе женгер фейи,
Руквад кIусни сенгер хьайи,
Миллетдин чIал пакдиз хвейи
Захъ Лезгистан уьлкве ава!
Четинвилиз таб гуз чидай,
Акьуллудаз яб гуз чидай,
Куьгьнедазни раб гуз чидай
Захъ Лезгистан уьлкве ава.
«Чан» лагьайдаз чан гуз гьазур,
«Къван» лагьайдаз къван гуз гьазур,
Душманар кьве патахъ къазур
Захъ Лезгистан уьлкве ава.
Уяхзавай гьар са бере,
Бармакдин чIичI тутур пеле,
ЧIехи къастар авай рикIе
Захъ Лезгистан уьлкве ава.
Чапхунчийриз къалурай зур,
Яр-дустари авур хатур,
Шарвилидин хуьзавай тур
Захъ Лезгистан уьлкве ава.
Гьахълувилин геле авай,
Кьисмет вичин гъиле авай,
Акьул-камал кьиле авай
Захъ Лезгистан уьлкве ава!
Фу нез тазвай халкьдив гьалал,
Эбеди чун кьунвай кIулал,
Шагьабудин къвечни чIалал –
Захъ Лезгистан уьлкве ава.