Кlватlалрин гуьруьш

«Марвар» эдебиятдин кlватlал

Шииратдин лепедаллаз. 

Гьар йисуз Ахцегьа кьиле физвай «Шарвили» эпосдин сувари чи халкь агудзава. Шарвилидин суварин йикъан экуьнахъ Ахцегьрин хуьруьн ктабханада эдебиятдин «Марвар» ва «Булах» кlватlалрин сергьятра аваз яратмишзавайбурун гуьруьш кьиле фена.  Къейд ийин, «Марвар» кlватlал Бакуда акъатзавай медениятдин «Алам» журналдин кьиле авайбуру адан са хел хьиз 2013-йисуз арадал гъана. Яратмишзавай ксарикай ибарат тир «Булах»  кlватlалдикай рахайтlа, ам тешкилайдалай инихъ са йис тамам хьанва. И кlватlалрин иштиракчийрикай гзафбур, чеб яшамиш жезвай чкадилай аслу тушиз, сифтедай интернетдин алакъадин куьмекдалди таниш хьанвайбур я. Кьилди къачуртlа, иштиракчийрин жигьетдай эдебиятдин кlватlалрин «география» лап гегьеншди я: иник Санкт-Петербургда, Голландия уьлкведа, Бакуда, Махачкъалада, Дербентда ва маса шегьерра, районрани хуьрера яшамиш жезвай, хайи чlалал яратмишзавай векилар акатзава. 
     Мярекат Азербайжан республикадай атанвай «Марвар» эдебиятдин кlватlалдин регьбер Эйваз Гуьлалиева ва «Булах»  эдебиятдин кlватlалдин регьбер Гуьзеля Гьасановади санал шииратдин лепедаллаз кьиле тухвана. Гьакlни иштиракайбурун арада «Лезги газетдин» политикадин отделдин редактор, алай аямдин тlвар-ван авай писатель ва публицист Нариман Ибрагьимов, «Алам» журналдин кьилин редактор, журналист Камран Къурбаналиев, шаирар тир Сейфудин Шагьпазов, Дильмира Ашурбегова,  Владик Батманов, Гульфия Пиругъланова, и цlарарин автор ва масабур авай. 
    Нубатдин гуьруьш яратмишзавай амадагри эсеррин гьакъиндай чпин арада веревирдер ийидай, цlийи шиирар кlелдай, кьисаяр ахъайдай, идал къведалди хьайи гуьруьшдилай инихъ теснифай эсеррин ва акъудай ктабрин гьакъиндай гьахъ-гьисаб ийидай, «Шарвилидин» суварикай фикирар лугьудай мярекатдиз элкъвена. 
     «Булахдин чешмедал» ктабдикай ам туькlуьрайбур тир Нариман Ибрагьимовани Гуьзеля Гьасановади ихтилатна. Нариман Ибрагьимова алай девирдин лезги эдебиятдикай, яратмишунрал машгъул ксарал акьалтзавай четинвилерикай, гележегдин фикиррикай, «Булахдин» макьсадрикай ихтилатна.  Г. Гьасановади вичин эсеррилай гъейри, чпиз нубатдин и мярекатда иштиракдай мумкинвал тахьанвай, амма ктабда эсерар гьатнавай «Булахдин» бязи векилрин шиирарни кlелна. 
     Иштиракчийрин ихтилатрай кьатlайвал, шииратдани гьикаятда чпин къелемар сифте яз ахтармишзавай жегьилар патал ихьтин кlватlалар халисан мектебриз элкъвезва.   
     - «Къенин юкъуз чахъ кхьизвай жегьилар аватlа, чи эдебиятдихъ пакагьан югъни ава. Гьавиляй жегьилриз рехъ гун, абуруз майданар ахъаюн герек я. Чахъ милли газетар, журналар, эдебиятдин кlватlалар мадни пара хьурай», - лагьана «Марвар» альманах туькlуьрайди тир шаир Э.Гуьлалиева. 
      Гьа ихьтин макьсаддалди, Э.Гуьлалиева къейд авурвал, «Алам» журналдин «Марвар-1» альманахда пешекар шаирринни писателрин эсеррилай гъейри,  гзафни-гзаф яратмишзавай жегьилриз майданар ахъайнава. Ана 30-далайни гзаф жегьилрин эсерар гьатнава. 
    Мярекатдал шаирар тир Сейфудин Шагьпазова, Дильмира Ашурбеговади, Гульфия Пиругълановади, Владик Батманова чпин цlийи шиирар кlелна. 
   «Марвар»  эдебиятдин кlватlалдин ва «Алам» журналдин патай Эйваз Гуьлалиевани Камран Къурбаналиева иштиракчийриз «Марвар-1» альманах ва «Алам» журналдин эхиримжи нумра пишкешна. «Булах» эдебиятдин кlватlалдин патай Гуьзеля Гьасановади вири иштиракчийриз «Булахдин чешмедал» тlвар алай ктаб  ва маса пишкешар гана. Къейд ийин, «Мавел» чапханада акъатнавай и ктабда 15 автордин эсерриз дуьнья акунва. Гележегда кьилиз акъудун патал абурухъ мадни экуь ва хъсан ниятар ава. Къуй абур кьилизни акъатрай! 
     Гуьруьш метлеблуди ва маракьлуди хьана.

К. ФЕРЗАЛИЕВ

Рубрика

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.