Ахвар

Ярх хьанва зун жуван сурун къерехдал.
Хъсан хьана, ам заз акур, ахвар яз.
Вилерал — нагъв, рикIни пIузар — пелехра,
Къецел — марфни, ири-ири тIвалар гваз.
Гьи дердери и чкадал гъанватIа?
Кьарай квахьна, рахаз жезвач мецевай.
Гьи азабри мез кIалхандихъ чIугуна?
Касни алач кьадай багъри гъиликай.
Ярх хьанва зун. Серт булутар цавалла,
Ара-ара ракъинин нур къалуриз.
Такур бахтар зи умудрин къавалла,
Гъамлу йикъар мадни артух агудиз.
Къарсурзава руьгьдин майдан къукърумри,
Заз акI жеда, тупарай зун ягъай хьиз.
Юзурзава рикIин къажгъан дувулри,
Гьич садрани захъ секинвал тахьай хьиз.
КIватI жезва халкь, мукьва-кьили, архаяр,
Шумудни сад, зун и гьалдиз гъайибур.
Кьве дуст яргъал, фад къайи хьай араяр,
Садни алач, захъ дерт чIугваз, кайибур.
Падзава рикI дерин залан хиялри,
Зи гъавурда акьадай кас амачтIа?
Курай уьмуьр, жаваб тахьай суалриз,
Куь умудрин рекье цуьквер цаначтIа?
Вири секин я, са келима лугьузвач,
Я къарагъдай мумкинвал зав вугузвач.
Кьуна кафан, чIугуна зун чилихъди,
Накьв вегьена, хъфена чеб кIвалихъди…
…Ахвар квахьна. Хкажна зун месикай,
Аялни паб гьахьна чими къужахда.
Билбил хьана зи сивевай мецикай,
Мукьва-кьили, дустарни захъ, дамахдай.
Ахьтин залан ахварар чаз герек туш,
ТIимил хьурай гьаятда халкь, накъвар гваз.
Зун гъамари чилел ханвай фелек туш,
Чархачи я, шад йикъарин хабар гвай.

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.