Мукьвара Мегьарамдхуьруьн райондин Бут-Къазмайрин юкьван школада “Зи халкьдикай ягьанатардайбурун хура зун гапур хьана акIида” лишандик кваз лезги чIалаз бахшнавай мярекат кьиле фена. Ана школадин директор Гуьлмет АБДУЛЛАЕВА, Бут-Къазмайрин хуьруьн клубдин директор Айдун МЕГЬАМЕДОВА, шаир Мукаил АГЬМЕДОВА, 2013-йисуз уьлкведин дережадаваз кьиле фейи “Йисан муаллим” конкурсдин гъалибчи Сулейман-Стальский райондин Герейханован хуьруьн 1-нумрадин школадин муаллим Шамсудин МАГЬАМДАРОВА, Мегьарамдхуьруьн райондин методкабинетдин къуллугъчийри - Зарема КЕРИМХАНОВАДИНИ Натела КЪАФЛАНОВАДИ, муаллимри, школьникри иштиракна.
Лугьун лазим я, хайи чIалаз ва литературадиз бахшнавай мярекатар Бут-Къазмайрин юкьван школада гьар йисуз тухузва. Амма алай йисуз тешкилайди амайбурулай къарагъарнавай месэлайрин важиблувилелди, кIвалахдин сергьятралди, тешкиллувилелди тафаватлу хьана.
Мярекат лезги чIаланни литературадин муаллим Рамазан ЖЕЛИЛОВА ачухна ва ам кьиле тухун гьа и школадин муаллим Фатума БУКАРОВАДАЛ ихтибарна. Вичин рахунра Ф.Букаровади алай вахтунда лезги чIал авай гьалдикай, ам хуьн ва вилик тухун патал гьялна кIанзавай месэлайрикай итижлу суьгьбет авуна. Герейханован хуьруьн 1-нумрадин школадин муаллим Шамсудин Магьамдарова ихьтин мярекат тешкилуник кьил кутурбуруз чухсагъул малумарна. Адан гафарай малум хьайивал, школьникрин арада мукьвал-мукьвал хайи чIалаз ва литературадиз бахшнавай мярекатар тухуни акьалтзавай несилар руьгьдин девлетриз мадни мукьва хьуниз таъсирзава.
Шаир Мукаил Агьмедова лезги чIалаз бахшнавай шиир кIелуналди, мярекатдикай вичин фикирарни лагьана. Къейд ийин хьи, Ф.Букарова и межлисдиз виликамаз гьазур хьанвай. Явашдаказ язавай музыкадин сесиналди школьникри Кьуьчхуьр Саидан, Етим Эминан, СтIал Сулейманан, Алкьвадар Гьасан эфендидин шиирар, Мегьамед Ярагъидин, Гьажи Давудан камаллу келимаяр кIелай тегьерди иштиракчийрик руьгь кутуна.
Гуьгъуьнлай Айдун Мегьамедова, 2-классдин ученик Амин Гьашумова, Фатума Букаровади тамамарай манийри мярекат мадни гурлу авуна.
Мярекатдин эхирдай школадин директор Гуьлмет Абдуллаева мярекатдин иштиракчийрин тIварцIихъ хуш келимаяр лагьана. Гуьгъуьнлай хайи чIал хуьнин ва вилик тухунин карда гьакъисагъвилелди зегьмет чIугунай ада Шамсудин Магьамдаровавни Фатума Букаровадив школадин администрациядин патай гьуьрметдин грамотаяр вахкана.
Желил ЖЕЛИЛОВ,
Бут-Къазмайрин юкьван школадин муаллим
Лезги газет
Добавить комментарий