Халкьдин рикIе - эбеди экуь къамат

Байрам Наврузбегович САЛИМОВ

Вахтар, вацIарай ятар хьиз, акунатакуна алатна физва. Накьан бязи жегьилар къе агьилар хьиз дегиш жезва.
Накьан къелемлух багъдиз элкъвена аквазва…
Амма накь чахъ галаз санал рахазхъуьрезвай, вичин сеслу чIаларалди
кIелзавайбур руьгьламишзавай устад чи патав гумачиз йис алатнавайди чир хьайила, рикIел пашман гьиссерин луж элкъвезва.
Дагъустандин халкьдин шаир Байрам Наврузбегович САЛИМОВА чахъ, “Лезги газетдин” редакциядин къуллугъчийрихъ, галаз вичин уьмуьрдин лап эхиримжи йикъаралди алакъа хуьзвай. Ада вичини ина яргъал йисара культурадин отделдин заведующий яз кIвалахайди, газетдикай адаз вичин багъри муг хьайидини рикIел хтайла, на лугьуди, чаз ам гилани, сивел вичиз гьамиша хас яз хьайи мили хъвер алаз, гъиле цIийиз кхьенвай эсеррин кIватIал аваз, “Ифей маша” - махсус рубрика давамариз къвезвайди хьиз жезва.
Гьайиф, ахьтин кар авач, устад ва чIехи дуст чахъ галамач. И йикъара (20майдиз) шаир чавай къакъатна йис тамам жезва. И кар кьатIайла, рикIе чIехи шаирдин экуь къаматди вичин тегьерда къалабулух твазва. Ада чаз вичин насигьатдин гафар тикрарзава: “Яшамиш хьухь, садазни регъуь жен тийирвал!” Чна адан ктабар гъиле кьазва, чав гагь шарагар галай туртурдин рахун, гагь ахвариз фин тийизвай чинардин кушкуш, гагь катна физвай булахдин ширшир, гагь СтIуррин хуьруьн экуьнин шагьвар, гагь Шагьнабатдинни Шагь дагъдин серинар агакьзава. - Ваъ! - лугьузва чна. - Шаирар рекьидач! Абурун руьгьди датIана инсаниятдиз хци жез, михьи жез, чилел, цавал - вири алемдал ашукь жез чирзава, къуллугъзава. Гьа икI чпиз эбедивал къазанмишзава. Байрам Наврузбегович Салимов 1929-йисан 5-майдиз Азербайжан Республикадин Къусар райондин СтIуррин хуьре дидедиз хьана. Ам 1947-йисуз, Дербентдин педучилище куьтягьна, армиядиз фена, анани Высший военно-воздушно-десантный училище акьалтIарна, ада 1958йисалди кьушундин частара офицер яз къуллугъна. 1958-1964-йисара ада газетда, журналда ва телевиденида отделдин заведующий, жавабдар секретарь ва редактор яз кIвалахна. 1964-йисалай ам СССР-дин писателрин Союздин член тир. Шаирдин сифте шиир 1947-йисуз чап авуна, адалай инихъ Махачкъалада, Бакуда, Алма-Атада ва Москвада адан цIудралди ктабар лезги, урус чIаларалди чапдай акъатна. Б.Салимован шиирар азербайжан, къазах, туьркмен, уйгур, эстон, белорус, фарс, испан, Дагъустандин халкьарин ва маса чIалариз таржума авунва. Шаирди сатирадинни юмордин жанрдани кIвалахна. 1982-йисуз ам и рекьяй “Литературный газетдин” “Къизилдин дана” тIвар алай премиядин лауреат хьана. Б.Салимов З.Ризвановахъ галаз санал кхьенвай ва сегьнейра эцигнавай “Дибироваз хъел къвезва”, “Гюльшен”, “Ашукь Лукьман” ва маса пьесайрин авторни я.
Шаирдин лап хъсан эсерар Дагъустандин школайрин учебникра гьатнава, адан чIалариз композиторри цIудралди авазар кхьенва. Б.Салимова З.Ризвановахъ галаз санал Къубадин лезгийрин фольклор къайдадиз гъана, лезги халкьдин игитвилин эпос “Шарвили” кIватIна, туькIуьрна, кьилдин ктаб яз чапдай акъудна. Гила чахъ “Шарвили” эпосдин суварни хьанва! Байрам Салимоваз 1994-йисуз Дагъустандин литература вилик тухунин карда хьанвай агалкьунрай “Дагъустан Республикадин культурадин лайихлу работник” лагьай гьуьрметдин ва 1999йисузни Дагъустандин халкьдин шаирвилин чIехи тIварар гана. Шаирди лугьудай: “Умудди хуьзва дуьньядал инсан”. Адан ирс чаз тунвай экуь умудар хьиз я. Садрани пуч тежер, рикIелай алудиз тежедай ирс… И чинин материалар гуналди чаз мад сеферда адан хизандиз, ирссагьибриз хьанвай магьрумвал кьезилариз, умудрин рехъ генани гьяркьуь ийиз кIанзава.
Шаир Байрам Салимов чахъ галама, инлай кьулухъни ам чи руьгьдин дестекрикай сад яз амукьда!

Мердали ЖАЛИЛОВ
Лезги газет

Рубрика

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.