Кlанда вун рикlиз, чан Дербент шегьер

( Дербентдин 2000 йисан юбилейдиз )

Ви гьар са куьче рикlиз я зи хуш,
Лекьер я гужлу ви гьар са хва, руш.
Веледдиз диде кlани кьван тегьер
Кlанда вун рикlиз, чан Дербент шегьер.

Гатфарихъ дагъдиз экъечlда цуьк, чlур,
Каспийдин ятар-ракъинал гуз нур.
Виридалай я вун багьа, иер!
Кlанда вун рикlиз, чан Дербент шегьер.

Зи азиз шегьер, тарих тир къизил
Ви къужахда вахт фена зи жегьил.
Вун ачух музей я, надирлу гевгьер
Кlанда вун рикlиз, чан Дербент шегьер.

Буьруьнждин асир ви эвел-бине,
Пуд имандин кьеб кьунвай лап вине.
Берекатлу хьуй ви кlвалер, бегьер
Кlанда вун рикlиз, чан Дербент шегьер.

Дагъдал аскер хьиз ви Нарын-къеле
Тарихдин шагьид, рагъ я ви пеле.
Валай къадимлу авани мегер,
Кlанда вун рикlиз, чан Дербент шегьер.

Чапхунчийривай къакъудиз тахьай,
Заманайривай агъузиз тахьай.
Ислягьбур хьурай ви йифер, сегьер,
Кlанда вун рикlиз, чан Дербент шегьер.

Бестужеван кlвал, асиррин тарар,
Тату-Бикедин, Къирхлердин сурар,
Жуьмя-Мискlиндин азандин ванер
Кlанда вун рикlиз, чан Дербент шегьер.

Чи Россиядин Кьибле патан зар,
Ипекдин рехъ яз машгьур хьайи тlвар,
Хуьзвай аманат тарихдин сирер,
Кlанда вун рикlиз, чан Дербент шегьер.

Гьейран жезва вал атайбур вири,
Пак шегьер я вун, масан, эбеди.
Дуствал хуьз мягькем шад я ви эллер,
Кlанда вун рикlиз, чан Дербент шегьер.

Кьве агъзур яшар хьанва ви тамам,
Кьиле ава ви игит хва Имам,
Ви абадвал хуьз, къакъажна гъилер
Кlанда вун рикlиз, чан Дербент шегьер.

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.