Дербентдин къеледив

Саламалейк, азиз шагьид асиррин!
Гьинва гьисаб на муьтIуьгъай гьасиррин!
Вад агъзурни тIимил я ви яшариз,
Жедач ви ирс са куьнизни ухшариз.
Дуьнья кьван я, заз чиз, а ви къадимвал,
Гьавиляйни ганва ваз ви даимвал.

Зулькъарнейяр, хаканарни хашимар -
Шумуд жуьре сердерарни гьакимар,
Динар, дунар, алукIунар, рахунар,
Пагь, гьикьван на ракъурна ви сафунай?..
Ви цларин гьар са гел са ивир я,
Лугьуз тежер гьи сах, гьи сур девир я...

Дустарилай тунва пара душманри,
Дувул фенва гьакьван дерин заманриз.
Хьелеринни, тураринни гуьллейрин
Къулар хьиз я, тIал акъуддай келлейриз.
Агъзурралди чилиз фейи чанари
Руьгь ганатIа яраб цIийи танариз?..

Кьвевар, кьудвар... Къванцин вилер, къапуяр
Къени серт я, амачтIани къанлуяр.
Сурар вуч я! Вири - лалбур акунрай,
Ни акъудна кьил абурун рахунрай?
Дустни душман, жувандини патанди -
Гьикьван яна гьа са чилел харманди?..

Ви гьуьл, белки, вили хъхьай иви я.
Дагъни гьакьван кьелералди кIеви я.
Амма хвена на асирриз азадвал!
Азадвили хвена чилиз абадвал.
Ви мердвални меденивал нихъ ава!
Мад садахъни ахьтин руьгьдин ник авач!

Ви фу атIуз хьайиди туш турунив!
Я къачузни хьайиди туш зурунив!
Мад хтайтIа эвер тавур ягъияр,
Ви рухвайри ийирди туш яргъияр,
Душман гатаз къарагъда фад лекьер яз,
Вагьшийрикай амукьдайбур лешер я.

Дуствилелай багьа мад вуч ава вахъ!
Рагъ я гьамни, кузвай даим цава вахъ!
ГьикI лугьудач масан мани дидедиз.
- Яшамиш хьухь, азиз шегьер, эбеди!
Яшамиш хьухь, аваз даим цуькведа!
Маса вахтар жедач Дербент уьлкведа!

Рубрика

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.