Дагъвидин гапур

( СОНЕТ )
Дагъвидин цлакай рахана гапур:
“Гьикьван хьуй секиндиз къакъара аваз,
Хуьз жезмач завайни зи кьарай-сабур
Дуьньядин гъулгъула япара аваз.
Ахкъуд тавуна саваш-дувандиз
Гамунал алкIурна зун цлал хьана.
Кутугай чIал талгьуз какаш замандиз
Са пипIел чуьнгуьрни ала, лал хьана.
Такабур уьзденрин дуст-сирдаш хьайи
ЧIагураг яз цлак дарих хьанва зун,
Гьи девир хьайтIани чеб угъраш хьайи,
Небгетрин ивидихъ къаних хьанва зун.
Атанва чIав зун къакъарай акъуддай,
Герек я заз майдан гьахъвал субутдай”.