Перейти к основному содержанию

Дагълара гатфар

Агь, гьикьван гуьзел я дагълара гатфар,
Ивида ргазва ашкъ жигьилдин хьиз!
Пешерал ацукьиз багълара марфар
Нурарив ац1узва лап къизилдин хьиз!

Таватрин акунри рик1 акъудна зи,
Мест хьана чиликай к1вач галудна зи,
Кьилевай акьулни егь, къакъудна зи,
Агь, гьикьван гуьзел я дагълара гатфар!

Цуьквери гьаядив кьил агъузнава,
Векьери т1арамдиз гъил цавузнава,
Гуьзелрин дердини зун гьажузнава,
Агь, гьикьван иер я дагълара гатфар!

Манияр лугьузва лекьерини кваз,
Чипиз хас вик1егьвал, кьет1енвилер тваз,
Хтанва чубарук шад лирлияр гваз,
Агь, гьикьван иер я дагълара гатфар!

Рахамир, чан эллер, киса са к1ус кьван,
Гатфарин нефесдиз ава вичин ван,
Ина гьар къванцикни гала ширин чан,
Агь, гьикьван иер я дагълара гатфар!

Шагьмардан Каспидин ванцик ц1игел я,
Самурдин къацу там тандин зи хел я,
Булахрин гьар са пад таватрин гел я,
Ят1ани иер я дагълара гатфар!

Добавить комментарий

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.