Перейти к основному содержанию

Куьруь шиирар

Хъут1уьн юкъуз  к1вач галк1ана  акъалдна зун,
Цавай кьилел ст1ал-ст1ал къвал къвазавай,
Пашман хьанач,   къарагъайла шад хьана зун -
Заз жувакай хайи чилин ни къвезавай!

             """""""

Зи бубадин руьгь вилериз акуна
Мич1и йифиз жуван к1валин варарал.
Рахайла зун чара ч1алал т1вар кьуна
Чин элкъуьрна ц1рана ам яргъара.

             """""""

Зи ватандин багъда авай тарарин
Кьуру пешер хайи чилел амукьрай.
Акъвазда зун хура пехъи гарарин,
Хайи чили хъипи либас алукьрай,

            """"""""
Ц1ийи к1урук1- т1ебиатдин жегьилвал
Тухъуьнзавай ц1айни экв заз дак1ан я!
Зулун йикъар - т1ебиатдин сефилвал
Ашкъ ргазвай рик1из гатфар масан я!

            """"""""

Лекь элкъвезвай суварикай хкатнавай
Чи душмандин вил акъуддай хъереп1 я зун!
 Ц1айлапандин луварикай тахт авунвай
Ватан патал ялав я зун, ц1верек1 я зун!

            """"""""

Алахъмир вун зун алемдиз дак1анриз,
Акъвазмир вун иер сик1 хьиз амалриз,
Лув гуз жедач вавай садран кьакьанриз,
Зи юрд-уба ц1айлапанрин макан я!

           """""""

Са зерре кьван бахтни канда инсандиз-
Ич1и гъилив дагъ чкадлай юзурда.
Гьалал фу хьуй, неда, валлагь, явандиз,
За къванцикай жавагьирар гьазурда!

Добавить комментарий

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.